एजेन्सी – फ्रान्सेली फरवार्ड एन्थोनी मार्सियलले ह्याट्रिक प्रहार गरेपछि म्यानचेस्टर युनाइटेडले इंग्लिस प्रिमियर लिग अन्तर्गत बुधबारको खेलमा सेफिल्ड युनाइटेडलाई ३-० ले पराजित गरेको छ ।

घरेलु मैदान ओल्ड ट्राफर्डमा म्यानचेस्टर युनाइटेडले सातौं मिनेटमा नै अग्रता लिएको थियो । मार्कस रासफर्डले पेनाल्टी क्षेत्रको दायाँ भागबाट दिएको लो क्रसलाई मार्सियलले पहिलो टचमा नै गोल गरेका थिए । मार्सियलले गोलरक्षक र डिफेन्सको बीचमा रहेपनि ६ यार्ड बक्सभित्र बललाई पोस्टको दिशा दिन सफल रहेका थिए ।

खेलको ४४ औं मिनेटमा मार्सियलले व्यक्तिगत दोस्रो गोल गरे । आरोन वान बिस्साकाले दायाँ विङ्गमा उत्कृष्ट मुभ बनाउँदै दिएको पासलाई मार्सियलले गोलमा परिणत गरेका थिए । पहिलो हाफमा २-० को अग्रता लिएको युनाइटेडले दोस्रो हाफमा केहि परिवर्तन गरेको थियो ।

खेलको ७४ औं मिनेटमा मार्सियलले ह्याट्रिक पूरा गर्दै युनाइटेडको जित पक्का गरे । उनले रासफार्डको पासलाई उत्कृष्ट चिप प्रहार गर्दै गोल गरेका थिए । उनको यो जारी सिजनको १९ औं गोल हो ।

मार्सियल सन् २०१३ मा रोबिन भान पर्सीपछि युनाइटेडका लागि ह्याट्रिक प्रहार गर्ने पहिलो खेलाडी बने । त्यसबेला युनाइटेडले सर एलेक्स फर्गुसनको प्रशिक्षणमा प्रिमियर लिग उपाधि जितेको थियो ।

यस जितसँगै युनाइटेड अंक तालिकाको पाँचौ स्थानमा यथावत रहेको छ । म्यानचेस्टर टोलीले ३१ खेलमा ४९ अंक जोडेको छ । सेफिल्ड भने ३१ खेलमा ४४ अंकसहित आठौं स्थानमा अड्केको छ ।

अन्य खेलको समाचार पढ्नुहोस् :

रियल म्याड्रिड लिगको शीर्षस्थानमा उक्लियो

लाजियो हार्दा शीर्षस्थानको युभेन्टसलाई फाइदा

फराकिलो जितसँगै लिभरपुल उपाधिनजिक

इन्टरको खेलमा ६ गोलको बराबरी

मार्सियलको ह्याट्रिकमा युनाइटेडको सहज जित