एजेन्सी – युभेन्टसका स्टार फरवार्डद्वय क्रिस्टियानो रोनाल्डो र पाउलो डिबालाले एकसाथ खेल्न थालेको प्रशिक्षक माउरिजियो सार्रीले बताएका छन् । केहि साताअघि मात्र सार्रीले दुवैलाई संगै खेलाउन कठिन हुने गरेको बताएका थिए ।

मंगलबार इटालियन सिरी ए अन्तर्गत जेओनाविरुद्ध युभेन्टसले ३-१ को जित दर्ता गर्दा रोनाल्डो र डिबाला दुवैले गोल गरे । यस जितसँगै युभेन्टसले अंक तालिकाको शीर्षस्थानमा ४ अंकको अग्रता पनि लियो । लिगको अन्त्य नजिकिंदै गर्दा युभेन्टसले उपाधि रक्षा गर्ने बलियो सम्भावना देखिएको छ । कोप्पा इटालियाको फाइनलमा हार बेहोरेयता युभेन्टसले लगातार जित दर्ता गर्दै आएको छ ।

एक समय रोनाल्डो र डिबालाले एकसाथ खेल्दा टोलीलाई थप दबाब पर्ने देखिएको थियो । एकै किसिमका खेलाडी भएकाले आक्रमण असन्तुलित भएको हो कि भन्ने सार्री आफैंले पनि प्रश्न गरेका थिए । तर मंगलबारको खेलमा दुवैले सँगै खेल्दै युभेन्टसलाई जितसम्म डोर्याए ।

खेलपछि बोल्दै प्रशिक्षक सार्रीले दुवैको प्रशंसा गरे । ‘दुवै खेलाडीले आफ्नो शैलीमा केहि परिवर्तन गरेका छन् । एक अर्कालाई सहज अवस्था दिन दुवैले मिहिनेत गरेको फल हो,’ उनले भने, ‘ एक अर्कालाई सहयोग गर्दा दुवैको प्रदर्शनमा सुधार आएपछि झन् मनोबल बढेको छ । खेलमा मात्र होइन प्रशिक्षणमा पनि यहि देखेको छु ।‘

जेनोआविरुद्ध पहिलो हाफमा लगातार दबाब कायम गरेपनि युभेन्टसले अग्रता लिन भने सकेको थिएन । तर दोस्रो हाफ सुरु भएको ५ मिनेटमा नै युभेन्टसले डिबालाको गोलमा अग्रता लियो । त्यसको ६ मिनेट नबित्दै रोनाल्डोले अग्रता दोब्बर पारेका थिए । डग्लस कोस्टाले समेत गोल गरेपछि युभेन्टसलाई ७६ औं मिनेटमा पिनामोन्टिको गोलले खासै असर गरेन ।

रोनाल्डोले सन् २०१९-२० सिजनमा गरेको कुल गोल संख्यालाई अहिले नै बराबर गरेका छन् । उनले जेनोआविरुद्ध सिजनको २८ औं गोल गरेका थिए । उनले सन् २०२० मा मात्र १४ गोल गरेका छन्, जुन सिरी ए मा सर्वाधिक पनि हो । सार्रीले पनि रोनाल्डोको प्रदर्शनमा सुधार आएको स्वीकारेका छन् ।

‘पहिलो हाफमा रोनाल्डोले ५ पटक गोलको लागि प्रहार गरे । यो पछिल्लो समय उनले सुधार गरेको संकेत होम, ‘ सार्रीले भने, ‘रोनाल्डो सामान्यतया गोल गर्नका लागि आफूलाई खुला रुपमा राख्न चाहन्छन् । तर जब उनी बललाई द्रुत गतिमा अगाडी बढाउँछन्, त्यसमा उनीभन्दा सायदै अरु राम्रो होलान् ।’

‘मैले रोनाल्डोलाई यसअघि नै विश्राम दिने सोचेको थिएँ । जब हामी ३-० ले अगाडी बढ्यौं मैले उनलाई परिवर्तन गरें । रोनाल्डोले पछिल्लो समय लगातार खेल्दै आएकाले उनको बारेमा सोच्नु आवश्यक थियो । उनले पनि मेरो कुरा बुझे र सहज रुपमा लिए,’ सार्रीले रोनाल्डोलाई परिवर्तन गर्नुको कारण प्रष्ट पारे ।

यो पनि पढ्नुहोस : बार्सिलोनामा ‘भिलेन’ बनेका सराबिया