एजेन्सी – इंग्लिस क्लब चेल्सीबाट यसै सिजनको सुरुवातमा रियल म्याड्रिड पुगेका विंगर इडेन हाजार्ड फेरी एकपटक चोटको शिकार बनेका छन् ।

जुन महिनामा एस्पान्योलविरुद्ध खेलमा चोट बोकेका हाजार्ड त्यसयता मैदानमा उत्रिएका छैनन् । उनले बुधबार पनि सामुहिक प्रशिक्षणमा सहभागिता जनाएनन् । रियलमा खराब सुरुवातसँगै चोट बोकेका हाजार्ड कोरोनापछि पुनरागमनमा भने प्रभावशाली देखिएका थिए । तर चोटले उनी फेरी विश्राममा बस्नुपरेको छ ।

एस्पान्योलविरुद्ध जितको दोस्रो हाफमा चोट लागेपछि उनले मैदान छाडेका थिए । त्यसपछि रियलले गेटाफे र एथ्लेटिक बिल्बाओलाई पराजित गर्दा उनी टोलीमा थिएनन् । यसै सिजन हाजार्ड दुई पटक एंकलको चोटले मैदान’बाहिर रहेका छन् । खेलको हिसाब नै गर्ने हो भनेपनि हाजार्डले २४ खेल गुमाईसकेका छन् ।

स्पेनिस रेडियो क्यादेना सेरका अनुसार हाजार्डले पुन: त्यहि एंकलमा चोट बोकेका छन् । परिक्षणका क्रममा ठूलो समस्या नदेखिएकाले क्लबले मानसिक रुपमा हाजार्ड तयार नरहेको हुनसक्ने आंकलन गरेको छ ।  तर हाजार्ड त्यो मान्न तयार छैनन् ।

हाजार्डले पछिल्लो समय विस्तृत परिक्षण भने गराएका छैनन् । उनी हाल पूर्ण रुपमा एंकललाई लक्षित गर्दै विशेष अभ्यास गरिरहेका छन् । उनले अलाभेसविरुद्ध खेलमा खेल्ने नखेल्ने अझैपनि टुंगो लागेको छैन । रियलले शुक्रबार राति घरेलु मैदानमा खेल्दैछ ।