एजेन्सी – इटालियन सिरी ए अन्तर्गत मंगलबार लेच्चेविरुद्ध खेलमा विपक्षी खेलाडीलाई टोकेपछि लाजियोका स्पेनिस डिफेन्डर प्याट्रिकलाई कारवाही गरिएको छ ।

२७ वर्षीय डिफेन्डर प्याट्रिकले दोस्रो हाफमा लाजियो २-१ ले पछाडी परेको अवस्थामा लेच्चेका गुलिओ डोनाटिको हातमा टोकेका थिए । रेफ्रीले उक्त घटना आफ्नो आँखाले नदेखेपनि लेच्चेका खेलाडीले अपिल गरेपछि भिडियो असिस्टेन्ट रेफ्री (भिएआर) को सहायता लिँदै रातो कार्ड देखाएका थिए ।

लिगले उनलाई ४ खेलमा निलम्बनसँगै १० हजार युरो जरिवाना गरेको छ । प्याट्रिकले अब जुलाई २० मा हुने शीर्षस्थानको युभेन्टससँगको खेल पनि गुमाउने छन् । उनले सामाजिक संजालमार्फत माफी समेत मागिसकेका छन् । ‘ मैले देखाएको व्यवहारको लागि माफी माग्दछु । म त्यसबेला बेहोसीमा थिएँ,’ उनले इन्स्टाग्राममा लेखेका छन् ।

प्याट्रिकले टोकेका डोनाटिले उक्त घटनामा कुनै चोट भने बोकेनन् । उनले प्याट्रिकको माफी पनि स्वीकार गरेका छन् ।’ कहिलेकाहीं खेलमा तनावको अवस्थामा के हुन्छ भन्न सकिन्न । गल्ति गर्नेले स्वीकार गरेपछि माफी दिनुपर्छ । खेलभित्रको कुरा त्यहाँ नै सकिन्छ,’ उनले भने ।

लाजियोलाई पछिल्लो समय चोटका कारण निकै समस्या हुँदै आएको थियो । लिगको यस निर्णयले टोलीलाई थप कठिन हुने भएको छ । युभेन्टसभन्दा ७ अंकले पछाडी रहेको लाजियो ७ खेल बाँकी रहँदा उपाधि होडमा नै रहन चाहन्छ ।