काठमाडौं (हाम्रो खेलकुद)– नेपाली सेनाको भद्रकालीस्थित जंगी अड्डाको फुटबल मैदानका लागि आवश्यक अन्य भौतिक पूर्वाधार निर्माण गरि अखिल नेपाल फुटबल संघ (एन्फा) ले शुक्रबार हस्तान्तरण गरेको छ ।

शुक्रबार आयोजित कार्यक्रममा एन्फा अध्यक्ष कर्मा छिरिङ शेर्पाले प्रधानसेनापती पूर्णचन्द्र थापालाई हस्तान्तरण गरेका थिए । अन्तर्राष्ट्रीय फुटबल प्रतियोगिता आयोजना गर्दा अभ्यास मैदानमा रुपमा सेनाको मैदान प्रयोग गर्ने उद्देश्यका साथ एन्फा र सेनाबीच सहकार्य भएको बताइएको छ ।

एन्फाले सेनाको मैदानमा आवश्यक पर्ने भिभिआइपी प्यारापिट मुनि रहेको २ वटा प्लेयर चेन्जिङ रुम, खेलाडीहरुका लागि व्यक्तिगत लकर, रेफ्री चेन्जिङ रुम, रेफ्रीका लागि लकर निर्माण गरेको थियो । त्यस्तै एन्फाले फिजियोथेरापी बेड, ऐन, फ्रिज, टेबल, तीन कोठामा कार्पेट लगाउनुका साथै रंग रोगन समेत गरिदिएको सेनाले जनाएको छ । निर्माण कार्यमा झन्डै १५ लाख रुपैयाँ खर्च भएको छ ।

असोजमा नेपालले विश्व कप छनोटको खेल आयोजना गर्दैछ । विश्व कप छनोट खेल्न अष्ट्रेलिया, चाइनिज ताइपे र जोर्डन फुटबल टोली नेपाल आउनेछन् । त्यसरी आउने विदेशी टोलीलाई अभ्यासका लागि त्यो मैदान स्तर उन्नती गर्न एन्फा र सेनाबीच सहमति भएको र त्यहि अनुरुप पूर्ननिर्माण भएको बताइएको छ ।

एन्फाका अध्यक्ष शेर्पाले सेनासँग सहकार्य गर्न पाउँदा खुसी लागेको बताए । प्रधानसेनापति थापाले नेपाली फुटबल विकासका लागि एन्फासँग भविष्यमा पनि सहकार्यलाई निरन्तरता दिने प्रतिबद्धता व्यक्त गरे ।