एजेन्सी – इंग्लिस क्लब लिभरपुलका कप्तान जोर्डन हेन्डरसन कम्तीमा पनि आठ साता मैदान बाहिर रहने भएका छन् ।  ब्राइटन होभ अल्वियोनविरुद्धको ३–१ को जित निकालेको खेलमा हेन्डरसनले गम्भीर चोट बोक्दै मैदानबाट बाहिरिएका थिए ।

यससँगै हेन्डरसनले यो सिजनको बाँकी रहेको चार खेलसँगै अर्काे सिजनको सुरुवाती खेल गुमाउने सम्भावना रहेको छ ।  प्रिमियर लिगको अर्काे सिजन सेप्टेम्वर पहिलो सातादेखि शुरु हुदैछ । हेन्डरसनले ७९औं मिनेटमा बाँया घुँडामा गम्भिर चोट लागेको देखिएको छ ।

घुँडाको लिगामेन्ट च्यातिएका कारण उनलाई पुर्णरुपमा फिट हुनको लागि कम्तीमा पनि आठ साता लाग्न सक्ने चिकित्सकले बताएका छन् ।

३० वर्षीय इंग्ल्यान्डका हेन्डरसनले सेप्टेम्बर पहिलो साता हुने नेसन्स लिगको दुई खेल पनि गुमाउने भएको छ । इंग्ल्यान्डले सेप्टेम्वर ५ मा आइसल्यान्ड तथा सेप्टेम्वर ८ मा डेनमार्कसँग खेल्ने तय छ ।

प्रिमियर लिगमा कीर्तिमानी एक सय अंक छुने दाँउमा रहेको लिभरपुललाई हेन्डरसनको चोटले समस्या पर्न सक्नेछ । प्रिमियर लिगको च्याम्पियन बनिसकेको लिभरपुलले अब बर्नली, आर्सनल, चेल्सी र न्युक्यासल युनाइटेडसँग खेल्न बाँकी छ । लिभरपुललाई म्यानचेस्टर सिटीसँगको कीर्तिमान बराबरी गर्न अब चार खेलबाट ८ अंकको खाँचो छ ।

२२ जुलाईको रातिमा घरेलु मैदानमा हुने चेल्सीसँगको खेलपछि लिभरपुलले प्रिमियर लिगको ट्रफी उचाल्ने छ । त्यसपछि लिभरपुलले न्युक्यासलसँग २६ जुलाईमा यो सिजनको अन्तिम खेल खेल्नेछ ।