एजेन्सी – पोर्चुगिज प्रशिक्षक जोसे मोउरिन्होले टोटेनहम हट्स्पर छोड्नुअघि क्लबलाई उपाधि जिताउने दाबी गरेका छन् ।

मोउरिन्होले गत नोभेम्बरमा मात्र ३ वर्षको लागि सम्झौता गर्दै टोटेनहममा आबद्ध भएका थिए । सिजनको सुरुवातमा माउरिसियो पोचेटिनोले टोलीलाई अपेक्षित नतिजा दिन नसकेपछि टोटेनहमले प्रशिक्षक परिवर्तन गरेको थियो । मोउरिन्होको प्रशिक्षणमा पनि क्लबले सुखद नतिजा निकाल्न सकिरहेको छैन ।

टोटेनहमले सन् २००८ यता कुनै उपाधि जित्न सकेको छैन । त्यसबेला लिग कप जितेको टोटेनहम गत सिजन च्याम्पियन्स लिगको फाइनलमा लिभरपुलको हातबाट हार बेहोरेको थियो । यस सिजन पनि क्लबले कुनै उपाधि नजित्ने पक्का भएको छ । तर मोउरिन्होले भने आफ्नो सम्झौता सकिनुअघि नै उपाधि जित्ने दाबी गरेका छन् ।

‘ मेरो सम्पूर्ण ध्यान ३ वर्षे सम्झौतामा छ । मलाई विश्वास छ तीन वर्षे कार्यकालमा हामीले उपाधि जित्नेछौं । यदि मैले सकिन भनेपनि क्लबले नयाँ युगमा उपाधि जित्नु भनेको सुखद नै हुन्छ,’ मोउरिन्होले भने ।

‘म क्लबको लागि काम गरिरहेको छु । म आफ्नोबारे मात्र सोचिरहेको छैन । मेरो र क्लबको सोचाइ एउटै छ र लक्ष्य पनि । अहिले मैले आफ्नो इतिहास भन्दापनि क्लबको नयाँ इतिहास रच्नेबारे सोचिरहेको छु,’ उनले थपे ।

‘म पहिलो दिनदेखि नै सकारात्मक सोचका साथ काम गरिरहेको छु । हामी केहि परिवर्तन ल्याउन सक्छौं भन्ने सोचका साथ अगाडी बढेका छौं । हामीले पछिल्लो सिजनजस्तो धेरै खर्च गर्न पनि जरुरि छैन,’ मोउरिन्होले भने ।