एजेन्सी – स्पेनिस ला लिगाको यो सिजन सकिने संघारमा पुगेको छ । ला लिगाको तीन चरणको खेल बाँकी रहँदा उपाधि दौडमा रियल म्याड्रिड र क्याटलान क्लब बार्सिलोना रहेका छन् ।

ला लिगाको ३५औं चरणको खेल सकिँदा रियलले साविकको विजेता बार्सिलोनालाई ४ अंकले पछि पार्दै उपाधि जित्ने सम्भावनालाई बलियो बनाएको छ । ला लिगामा आजदेखि ३६औं चरणको खेलहरु सुरु हुनेछ ।  उपाधि दौडमा रहेको बार्सिलोनाले आज राति तुलनात्मक रुपमा कमजोर प्रतिद्वन्द्वी रियल भालाडोलिडको सामना गर्दैछ । खेल भालाडोलिडको मैदानमा नेपाली समयअनुसार राति ११ः४५ बजे हुनेछ ।

उपाधि यात्रालाई जीवितै राख्न बार्सिलोनालाई जित बाहेकको विकल्प छैन । त्यसैले बार्सिलोना भालाडोलिडविरुद्ध जितको लक्ष्यसहित मैदान उत्रनेछ । भालाडोलिडसँग पराजित भएमा बार्सिलोनाको उपाधि होड कमजोर मात्रै बन्ने छैन सोमबार ग्रानडालाई पराजित गरेमा रियल दुई खेल बाँकी छदै ला लिगाको च्याम्पियन बन्नेछ ।

भालाडोलिडलाई हराएमा बार्सिलोनाले रियलसँगको अंक दुरी समेत १ मा झार्दै उपाधि यात्रालाई जीवितै राख्नेछ । बराबरीले ३ तथा हारले बार्सिलोना चार अंकले पछि पर्नेछ । अग्रपङ्तिका तीन खेलाडी कप्तान लियोनेल मेस्सी, लुइस सुआरेज र एन्टोइन ग्रिजमनको समन्वय मिलिरहेको छ ।

भालाडोलिड पनि बार्सिलोनालाई स्तब्ध पार्दै अंक तालिका सुधार गर्ने अभियानमा हुनेछ । बार्सिलोनाको ३५ खेलबाट ७६ अंक तथा रियलको ८० अंक छ । ३९ अंक जोडेको भालाडोलिड १४औं स्थानमा रहेको छ ।

ला लिगा अन्तर्गत अर्काे खेलमा एट्लेटिको मड्रिड र रियल बेटिस तथा ओसासुना र सेल्टा डि भिगोबीच प्रतिस्पर्धा हुनेछ ।