एजेन्सी – इंग्लिस फरवार्ड रहिम स्टर्लिङको ह्याट्रिक मद्दतमा म्यानचेस्टर सिटीले इंग्लिस प्रिमियर लिगमा ब्राइटनमाथि फराकिलो जित हात पारेको छ । सिटीले घरेलु टोली ब्राइटनमाथि ५–० को फराकिलो जित हात पारेको हो ।

दि अमेरिकन एक्सप्रेस कम्युनिटी स्टेडियममा शनिबार सात भएको खेलमा सिटीको जितमा रहिमको ह्याट्रिकसँगै ग्याब्रियल जेसस र बर्नाडो सिल्भाले पनि गोल गरे । सिटीले पहिलो हाफमा दुई तथा दोस्रो हाफमा तीन गोल थीन सफल भएको थियो । खेलको २१औं मिनेटमा ग्याब्रियल जेससको पासमा रहिमले गोल गर्दै सिटीलाई अग्रता दिलाएका थिए ।

४४औं मिनेटमा रोड्रीको पासमा जेससले गोल गरेपछि सिटीले पहिलो हाफमा २–० को अग्रता लिन सफल भयो ।  ५३औं मिनेटमा स्ट्रलिङले रियाद महारेजको पासमा गोल गरेपछि सिटीले खेलमा ३–० को अग्रता बनायो । ५६औं मिनेटमा बर्नाडो सिल्भाले जेससको पासमा गोल गर्दै सिटीलाई फराकिलो जिततर्फ अग्रसर गराए ।

८१औं मिनेटमा स्टर्लिङले ह्याट्रिक पुरा गरेपछि सिटीले ५–० को फराकिला जित निकाल्न सफल भयो । जितसँगै सिटीको यो सिजन दोस्रो स्थान लगभग पक्का भएको छ । सिटीको ३५ खेलबाट ७२ अंक पुगेको छ । पराजित ब्राइटन ३६ अंक जोडेर १५औं स्थानमा छ ।