एजेन्सी – क्याटलान क्लब बार्सिलोनाका कप्तान लिओनेल मेस्सीले कोरोनापछि लिग सुरु भएयता सबै खेलमा पूरा समय खेलेका छन् ।

क्लबका प्रशिक्षक किके सेटिन पनि मेस्सीलाई विश्राम अति आवश्यक रहेको स्वीकार्छन् । तर त्यसो गर्न सक्ने अवस्थामा भने छैनन् । शनिबार रियल भालाडोलिडविरुद्ध जितपछि सेटिनले मेस्सीलाई विश्राम दिन चाहेर पनि खेलको अवस्थाका कारण त्यसो गर्न नसकेको बताए ।

‘ मेस्सीलाई विश्रामको एकदम खाँचो छ । तर खेल निकै प्रतिस्पार्धात्मक थियो । हामीले पहिलो हाफमा नै अग्रता बढाएको भए केहि खेलाडीलाई विश्राम दिने थिएँ । तर १-० को अग्रता हुँदा मेस्सीलाई परिवर्तन गर्न सकिन्न,’ सेटिनले भने ।

मेस्सीले विश्राम नपाएपनि अर्का फरवार्ड लुइस सुआरेज भने शनिबार पहिलो रोजाईमा थिएनन् । उनी दोस्रो हाफमा मैदान छिरेका थिए । ‘सुआरेजलाई पनि विश्राम चाहिएको थियो । उनले लगातार ५ खेल खेलेका थिए । शनिबार केहि विश्रामले उनलाई मदत पुग्नेछ,’ सेटिनले भने ।

एन्टोइन ग्रिजमन पहिलो हाफपछि परिवर्तन हुनुको कारण भने चोट नै रहेको सेटिनले प्रष्ट पारे । ‘ ग्रिजमन आफैंले हाफपछि आफूलाई केहि असहज भएको बताए । हामीले अहिले केहि भन्ने अवस्था छैन । विस्तृत परिक्षणपछि उनको रिपोर्ट हेरेर के गर्ने थाहा हुन्छ,’ सेटिनले थपे ।

चोटका कारण ओस्मान डेम्बेले लामो समयदेखि मैदानबाहिर छन् । यस्तै फ्रांकी डे योङको चोटले पनि बार्सिलोनाको मिडफिल्डमा केहि समस्या उत्पन्न भएको छ । डिफेन्डरद्वय स्यामुएल उम्टिटी र जुनिअर फिर्पो पनि फिट हुन संघर्षरत छन् ।