एजेन्सी – इटालियन सिरी ‘ए’ मा नेपोली र एसी मिलानले बराबरी खेलेको छ । नेपोली र मिलानले २–२ गोलको रोमाञ्चक बराबरी खेल्दै अंक बाँडेका हुन् ।

स्टेडियो सान पाओलोमा आइतबार राति भएको खेलमा घरेलु टोलीका जियोभानी डि लोरेन्जो र ड्रिएस मेर्टिन्सले गोल गर्दा मिलानका थियो हर्नान्डेज र फ्रान्क केसिइले गोल गरे ।

खेलको २०औं मिनेटमा एन्टी रेविचको पासमा हर्नान्डेजले गोल गर्दै मिलानलाई अग्रता दिलाएका थिए । ३४औं मिनेटमा लोरेन्जोले बराबरी गोल फर्काएपछि पहिलो हाफ १–१ गोलको बराबरीमा टुंगिएको थियो ।

६०औं मिनेटमा मेर्टिन्सले मारिया कालेजोनको पासमा गोल गरेपछि घरेलु टोली नेपोलीले खेलमा २–१ को अग्रता लिन सफल भयो । तर, ७३औं मिनेटमा फ्रान्कले पेनाल्टीमार्फत गोल गर्दै खेललाई २–२ गोलको बराबरीमा ल्याए ।

जियाकोमो बोनाभेन्टुरालाई नेपोलीका डिफेन्डर निकोला माक्सीमोभिकले फउल गरेपछि रेफ्रीले मिलानलाई पेनाल्टीको मौका दिएका थियो । जसमा फ्रान्क चुकेनन् ।

खेलको अन्त्यतिर मिलान १० खेलाडीमा समेटिएपनि त्यसको फाइदा नेपोलीले उठाउन सकेन । ८७औं मिनेटमा मिलानका एलेक्सिस सेलेमेकर दोहोरो पँहेलो कार्ड खादै मैदानबाट बाहिरिएका थिए ।

बराबरीसँगै नेपोली ३२ खेलबाट ५२ अंक जोडेर छैटौ स्थानमा यथावत रहँदा मिलान ५० अंक जोडेर सातौ स्थानमा यथावत रहेको छ ।

अन्य नतिजा

जिनोआविरुद्ध एस्पाल (२–०)

काग्लिएरीविरुद्ध लेच्चे (०–०)

फियोरेन्टिनाविरुद्ध हेलास भेरोना (१–१)

पार्माविरुद्ध बोलोग्ना (२–२)

उडिनेसीविरुद्ध साम्पडोरिया (१–३)