एजेन्सी – स्पेनिस ला लिगामा आज राति ३६औं चरणका विभिन्न तीन खेलमा प्रतिस्पर्धा हुँदैछ । शीर्षस्थानले रियल म्याड्रिडले ग्रानडाको भ्रमण गर्दा डिपोर्टिभो अलाभेसले गेटाफेसँग तथा भिल्लारियल र रियाल सोसिडाडबीच पनि आजै प्रतिस्पर्धा हुँदैछ ।

रियल र ग्रानडाबीचको खेल ग्रानडाको मैदानमा नेपाली समयअनुसार राति १ः४५ बजे हुनेछ । उपाधि नजिक रहेको रियल ग्रानडालाई पराजित गर्दै उपाधि यात्रालाई थप मजवुत बनाउने लक्ष्यमा मैदान उत्रनेछ । तीन चरणको खेल बाँकी रहँदा रियललाई उपाधिका लागि रियललाई दुई जितको खाँचो छ ।

ग्रानडालाई हराए रियलले शीर्षस्थानमा बार्सिलोनालाई पुनः ४ अंकले पछि पार्नेछ । पराजित भएमा १ तथा बराबरीमा रोकिएमा २ अंकको अग्रता लिनेछ । शीर्षस्थानको रियलको ३५ खेलबाट ८० अंक छ । ३६ खेलबाट दोस्रो स्थानमा रहेको बार्सिलोनाको ७९ अंक छ । ग्रानडाको ३५ खेलबाट ५० अंक छ ।

रियलले ग्रानडासहित भिल्लारियल र लेगानेससँग खेल्न बाँकी छ । ग्रानडालाई हराएर बाँकी दुई खेलमा बराबरी गरेपनि रियल च्याम्पियन बन्ने छ । त्यसैले रियल ग्रानडाविरुद्ध ३ अंक लिने दाँउमा हुनेछ । कप्तान तथा डिफेन्डर सर्जियो रामोस र अर्का डिफेन्डर ड्यानी कार्भाजले ग्रानडाविरुद्ध पूनरागमन गर्दा चोटका कारण अर्काे सेन्टरब्याक मार्सेलो उपलब्ध हुनेछैन ।

कोरोनापछिको सबै ८ खेलमा जित निकालेको रियल लगातार नवौं जितको खोजीमा हुनेछ । फरवार्ड करिम बेन्जेमाको लय र युवास्टार रोड्रिगो र भिनिसियस जुनियरको उच्च प्रदर्शनले रियलले ग्रानडाविरुद्ध जित दर्ता गर्न सक्नेछ ।

यता, ग्रानडा पनि रियललाई स्तब्ध पार्दै अंक तालिकामा सुधार गर्दै शीर्ष ६ मा रहेको गेटाफेसँग अक बराबरी गर्ने दाँउमा हुनेछ । १०औं स्थानमा रहेको ग्रानडाले रियलविरुद्ध जित हात पारे एथ्लेटिक बिल्वाओ, रियल सोसिडाड र भ्यालेन्सियालाई पछि पार्दै सातौ स्थानमा उक्लेनछ ।

ग्रानडाका लागि रोवर्टाे सोल्डाडो, कार्लाेस फर्नान्डेज, डोमिङअस डुआर्टे जस्ता खेलाडीहरु हुनेछन् । हेड टु हेडमा हेर्दा ग्रानडाविरुद्ध रियल नै हावी हुने देखिएको छ । पछिल्लो १३ खेलको नतिजा अ‍ेर्दा रियलले १२ खेलमा जित हात पार्दा ग्रानडाले एक खेलमा आफ्नो पक्षमा पारेको छ । २०१३ को फेब्रुअरीमा भएको ला लिगामा क्रिस्यिानो रोेनाल्डोको आत्मघाती गोलबाट ग्रानडाले १–० को जित निकालेको थियो ।

अन्य खेल

डिपोर्टिभो एलाभेसविरुद्ध गेटाफे (राति ११ः१५ बजे)

भिल्लारियलविरुद्ध रियल सोसिडाड (राति ११ः१५ बजे)