एजेन्सी – इन्ज्युरी समयमा माइकल ओवाफेमीले गोल गरेपछि इंग्लिस प्रिमियर लिगमा शीर्ष चारको दौडमा रहेको म्यानचेस्टर युनाइटेड जितबाट वञ्चित बनेको छ । युनाइटेड साउथह्याम्पटनसँग २–२ गोलको बराबरीमा रोकिदै अंक बाड्न बाध्य बनेको हो ।

यो बराबरीले म्यानचेस्टर युनाइटेडले चेल्सी र लेस्टर सिटीलाई पछि पार्दै शीर्ष तीनमा उक्लने अवसर गुमाउदा अर्काे सिजनको लागि च्याम्पियन्स लिग खेल्ने सम्भावनामा समेत धक्का लागेको छ । बराबरीपछि लेस्टरसँग समान ५९ अंक भएपनि युनाइटेड गोल अन्तरमा पछि पर्दै पाँचौ स्थानमा यथावत छ ।

घरेलु मैदान ओल्डट्राफोर्डमा सोमबार राति भएको खेलमा युनाइटेड स्टुआर्ट आम्सट्रोङको गोलबाट खेलको १२औं मिनेटमा पछि परेको थियो । तर, युनाइटेडले चार मिनेटको अन्तरमा दुई गोल गरेपछि युनाइटेडले खेलामा २–१ को अग्रता बनाएको थियो ।

२०औं मिनेटमा मार्कुस रासफोर्डले एन्थोनी मार्सियलको पासमा गोल गर्दै खेललाई १–१ गोलको बराबरीमा ल्याएका थिए । २३औं मिनेटमा ब्रुनो फर्नान्डेजको पासमा एन्थोनी मार्सियालले गोल गर्दै युनाइटेडलाई खेलमा २–१ को अग्रता दिलाएका थिए । त्यसअघि १६औं मिनेटमा रासफोर्डले गोल गरेपनि उनी अफसाइड ठहरिएका थिए ।

प्रतिस्पर्धात्मक खेलमा त्यसपछि दुवै टोलीले गतिलो आक्रमण बुन्न सकेको थिएन । युनाइटेडसँग हारतर्फ उन्मुख रहेका साउथह्याम्पटनका लागि ओवाफेमीले इन्ज्युरी समयको थप गरिएको छैटौ मिनेटमा गोल गर्दै अंक खोस्न सफल हुदा युनाइटेडलाई जितबाट वञ्चित गराए । जान बेडनरेकको कर्नरमा ओवाफेमीले हेडमार्फत सहजै गोल गर्दै खेललाई २–२ गोलको बराबरीमा ल्याए । जितबाट वञ्चित भएपनि युनाइटेड पछिल्ला १८ खेलमा अपराजित रहन सफल भएको छ ।

बराबरीसँगै तेस्रो स्थानमा उक्लने अवसर गुमाएको युनाइटेडको ३५ खेलबाट ५९ अंक पुगेको छ । साउथह्याम्पटन ४५ अंक जोडेर १२औं स्थानमा यथावत छ ।