एजेन्सी – दुई गोलको अग्रता लिएर पनि जोगाउन नसक्दा युभेन्टस इटालियन सिरी ‘ए’ मा सस्सुलोसँगको हारबाट जोगिएको छ ।एलेक्स सान्द्रोले गोल गरेपछि युुभेन्टस सस्सुलोसँग ३–३ गोलको बराबरी बराबरी खेल्दै हारबाट जोगिएको हो । 

सस्सुलोविरुद्ध गोल गर्न नसक्दा सुपरस्टार फरवार्ड क्रिस्टियानो रोनाल्डो लगातार सातौ खेलमा गोल गर्न असफल रहे । यसअघि रोनाल्डोले लगातार ६ खेलमा गोल गरेका थिए । सस्सुलोको मैदानमा बुधबार राति भएको खेलमा युभेन्टसका लागि डानिलो, गोन्जालो हिगुआइन र एलेक्स सान्द्रोले गोल गरे । घरेलु टोलीका फिलिप, डोमिनिको बेरारडी र फ्रान्सिस्को कापुटोले गोल गरे ।

रोमाञ्चक बनेको खेलको छैटौ मिनेटमा नै मिरालेम प्यानिचको पासमा डानिलोको गोलबाट युभेन्टसले शुरुवाती अग्रता बनाएको थियो । १२औं मिनेटमा प्यानिचकै पासमा हिगुआइनले गोल गरेपछि युभेन्टसले खेलमा २–० को अग्रता लिन सफल भयो ।

२९औं मिनेटमा घरेलु टोलीका फिलिप डिजुरिसिसले गोल गर्दै खेललाई पहिलो हाफमा २–१ को अवस्थामा ल्याए । ५१औं मिनेटमा डोमेनिकोले गोल गर्दै खेललाई २–२ गोलको बराबरीमा ल्याए । त्यसको तीन मिनेटपछि नै फ्रान्सिस्कोले गोल गरेपछि युभेन्टस खेलमा पछि परेको थियो । ६४औं मिनेटमा युभेन्टसका एलेक्स सान्द्रोले गोल गर्दै खेललाई ३–३ गोलको बराबरीमा ल्याए । त्यसपछि थप गोल निस्कन नसक्दा खेल बराबरीमा टुंगियो ।

बराबरीसँगै युभेन्टसले शीर्षस्थानमा एटलान्टालाई ७ अंकले पछि पारेको छ । युभेन्टसको ७७ तथा एटलान्टाको ७० अंक छ । सस्सुलो ४७ अंक जोडेर सातौ स्थानमा रहेको छ ।

अन्य नतिजा

बोलोग्नाविरुद्ध नेपोली (१–१)

एसी मिलाविरुद्ध पार्मा (३–१)

साम्पडोरियाविरुद्ध काग्लिएरी (३–०)

लेच्चेविरुद्ध फियोरेन्टिना (१–३)

रोमाविरुद्ध हेलास भेरोना (२–१)

उडिनेसीविरुद्ध लाजियो (०–०)