एजेन्सी – इंग्लिस फरवार्ड ह्यारी केनले दुई तथा दक्षिण कोरियन फरवार्ड ह्युङ मिन सनले एक गोल गरेपछि टोटेनहम हस्टपरले इंग्लिस प्रिमियर लिगमा न्युक्यासल युनाइटेडमाथि ३–१ को सहज जित हात पारेको छ ।

घरेलु मैदानमा न्युक्यासलका माट रिट्चीले एक गोल फर्काए । सेन्ट जेम्स पार्कमा बुधबार राति भएको खेलमा जियोभानी लो सेल्सोको पासमा सनले गोल गर्दै टोटेनहमलाई अग्रता दिलाएका थिए ।

५६औं मिनेटमा माट रिचीले गोल गर्दै खेललाई १–१ गोलको बराबरीमा ल्याए । उनले डिफेन्सले क्लियर गर्न कमजोरी गरेपछि पेनाल्टी क्षेत्रभित्र शक्तिशाली प्रहार गोलमा परिणत गरेका थिए ।

६०औं मिनेटमा केनले गोल गर्दै टोटेनहमलाई २–१ को अग्रता दिलाए । वैकल्पिक खेलाडी स्टिभन बर्गवाइनको क्रसमा केनको हेडरलाई गोलरक्षक मार्टिन डुब्राभ्काले बचाउने अवसर नै पाएनन् ।

समयमा केनले व्यक्तिगत दोस्रो तथा टोलीका लागि तेस्रो गोल गर्दै टोटेनहमलाई ३–१ को सहज जित दिलाए । काउन्टर अट्याकमा एरिक लामेलाले गरेको प्रहार डुब्राभ्काले बचाएपनि केनले रिबाउन्डलाई डाइभिङ् हेडरमा गोल गरे ।

जितसँगै टोटेनहमले अर्काे सिजनको युरोपा लिग खेल्ने सम्भावना जीवितै राखेको छ । टोटेनहम ३६ खेलबाट ५५ अंक जोडेर सातौ स्थानमा रहेको छ । न्युक्यासल ४३ अंक जोडेर १३औं स्थानमा छ ।