एजेन्सी – फरवार्डद्धय मार्कुस रासफोर्ड र एन्थोनी मार्सियालले गोल गरेपछि म्यानचेस्टर युनाइटेडले इंग्लिस प्रिमियर लिगमा क्रिस्टल प्यालेसमाथि २–० को सहज जित हात पारेको छ ।

यो जितको शीर्ष चार प्रतिस्पर्धा झनै रोमाञ्चक बनेको छ । दुई चरणको खेल बाँकी रहँदा तेस्रो देखि पाँचौसम्मको टोलीबीच मात्रै एक अंकको फरक छ । शीर्षचारको दौडमा युनाइटेडले चेल्सी र लेस्टर सिटीलाई पछ्याइरहेको छ । चेल्सीको ६३ तथा लेस्टर र युनाइटेडको समान ६२ अंक छ । अब दुई चरणको खेलमा कुनै पनि टोलीले हार भोगेमा शीर्ष चारको सम्भावना सकिनेछ ।

सेलह्रस्ट पार्कमा युनाइटेडले पहिलो र दोस्रो हाफमा समान एक गोल गरे । घरेलु टोलीलाई दवावमा राखेपनि युनाइटेडले पहिलो गोलको लागि पहिलो हाफको इन्ज्युरी समय नै कुर्नुपरेको थियो । इन्ज्युरी समयमा मार्कुस रासफोर्डले गोल गर्दै युनाइटेडलाई अग्रता दिलाए ।

५५औं मिनेटमा घरेलु टोलीका जोर्डन एयुले गोल गरेपनि भिएआरबाट उनी अफसाइड ठहरिए । ६०औं मिनेटमा डेभिड हे गेयाले उत्कृष्ट बचाउ गर्दै युनाइटेडको बराबरी टारे । ७८औं मिनेटमा रासफोर्डको पासमा मार्सियालले गोल गर्दै युनाइटेडलाई २–० को जितसहित महत्वपुर्ण ३ अंक दिलाए ।

जितपछि पाँचौ स्थानमा यथावत रहेको युनाइटेडको ३६ खेलबाट ६२ अंक पुगेको छ । हारपछि क्रिस्टल प्यालेस ४२ अंक जोडेर १४औं स्थनमा यथावत छ ।