एजेन्सी – रेलिगेसन जोनमा रहेको एस्पालमाथि सानदार जित निकाल्दै इन्टर मिलान इटालियन सिरी ‘ए’ को दोस्रो स्थानमा उक्लन सफल भएको छ । इन्टरले घरेलु टोलीमाथि ४–० को फराकिलो जित हात पारेको हो ।

पाउलो माज्जा फेरारामा बिहीबार राति भएको खेलमा इन्टर मिलानको फराकिलो जितमा एन्टेनियो क्यानड्रेभा, क्रिस्टियानो बिराघी, एलेक्सिस सान्चेज र रोवर्टाे गाग्लियारडिनीले गोल गरे । पहिलो हाफमा १ तथा दोस्रो हाफमा ३ गोल सम्भव भएको थियो ।

३७औं मिनेटमा एन्टेनियोको गोलबाट इन्टर मिलानले गोलको खाता खोलेको थियो । उनले सान्चेजको पासलाई सदुपयोग गरेका थिए । ५५औं मिनेटमा क्रिस्टियानोले गोल गर्दै इन्टर मिलानको अग्रता दोब्बर पारे ।

त्यसको ५ मिनेटपछि नै सान्चेजले क्रिस्टियानोको पासमा गोल गर्दै इन्टर मिलानलाई फराकिलो जिततर्फ अग्रसर गराए । ७३औं मिनेटमा रोवर्टाेले गोल गर्दै इन्टर मिलानलाई ४–० को फराकिलो जित दिलाए ।

जितसँगै इन्टर दोस्रो स्थानमा उक्लन सफल भएको छ । इन्टरको ३३ खेलबाट ७१ अंक पुगेको छ । इन्टरले इटलान्टालाई एक अंकले पछि पारेको हो । यस्तै इन्टरले शीर्षस्थानको युभेन्टससँगको अंकदुरी ६ मा छोट्याएको छ । युभेन्टसको ७७ अंक छ । पराजित एस्पाल १९ अंक जोडेर पुछारमा छ ।

यस्तै अर्काे खेलमा टोरिनोले जिनोआमाथि ३–० को सहज जित हात पारेको छ । टोरिनोको जितमा ग्लेइसन ब्लेमेर, सासा लुकिक र एन्ड्रिय बेलोटोली गोल गरे । जितसँगै टोरिनो ३३ खेलबाट ३७ अंक जोडेर १५औं स्थानमा उक्लदा जिनोआ ३० अंक जोडेर १७औं स्थानमा यथावत छ ।