एजेन्सी – रियल मालोर्का स्पेनिस ला लिगाबाट रेलिगेसनमा पर्ने दोस्रो टोली बनेको छ । ग्रानडासँगको २–१ को हारसँगै मालोर्काे दोस्रो डिभिजनमा घटुवा हुने दोस्रो टोली बनेको हो । 

यसअघि एस्पान्योल दोस्रो डिभिजनमा घटुवा भएको थियो । घरेलु मैदानमा खेलमा लिएको अग्रता जोगाउन नसक्दा मालोर्का एक खेल बाँकी छदै दोस्रो डिभिजनमा घटुवा भएको हो । मालोर्का ३७ खेलबाट ३२ अंक जोडेर १९औं स्थानमा रह्यो ।

अन्तिम खेलमा जित हात पारेपनि मालोर्काको रेलिगेसन टर्नेछैन । घरेलु मैदानमा ९ खेलाडीमा खेलको अन्त्य गरेको मालोर्काले खेलको २०औं मिनेटमा जुवान हर्नान्डेजको पासमा गोल गर्दै खेलमा अग्रता बनाउन सफल भएको थियो । पहिलो हाफको थप गरिएको पहिलो मिनेटमा भिक्टर डियाजले गोल गर्दै खेललाई १–१ गोलको बराबरीमा ल्याए ।

६९औं मिनेटमा कार्लाेस फर्नान्डेजले गोल गर्दै ग्रानडाको जित पक्का गरे । ८०औं मिनेटमा घरेलु टोली मालोर्का १० खेलाडीमा समेटियो । एलेक्ससन्डर सेड्लर सिधै रातो कार्ड खादै मैदानबाट बाहिरिए ।

खेलको अन्त्यतिर जुवान हर्नान्डेज दोहोरो पँहेलो कार्ड खादै मैदानबाट बाहिरिएपछि मालोर्का ९ खेलाडीमा समेटिएको थियो । यो जितले ग्रानडा ५३ अंक जोडेर नवौं स्थानमा रहेको छ । भ्यालेन्सियासँग अंक बराबरी रहेपनि हेड टु हेडमा ग्रानडा पछि परेको हो ।