एजेन्सी – स्पेनिस लेजेन्ड गोलरक्षक इकर कासिलास पुर्वक्लब रियल म्याड्रिड फर्कने भएका छन् । १६ वर्ष रियलबाट खेलेका लेजेन्ड तथा पुर्व कप्तानसमेत रहेका कासिलास पेरेजको सल्लाहकारको रुपमा सान्टियागो बर्नाबेउ फर्किन लागेका हुन् ।

रियलका लेजेन्डसमेत रहेका गोलरक्षक कासिलास व्यवस्थापकीय भुमिकाका म्याड्रिड फर्कन लागेको स्पेनिस मिडिया मार्काले जनाएको छ । ३९ वर्षे लेजेन्ड गोलरक्षक कासिलास रियलका अध्यक्ष फ्लोरेन्टिनो पेरेजका सल्लाहकारका रूपमा रहनेन् । पेरेजले कासिलासलाई सल्लाहकारका रूपमा प्रस्ताव गरेको र यो प्रस्तावलाई कासिलास सहमत जनाएको मार्काले जनाएको छ ।

रियलका प्रशिक्षक जिनेदिन जिदानले पनि प्रशिक्षक बन्नुअघि अध्यक्ष पेरेजको सल्लाहकारको रुपमा काम गरेका थिए । त्यसपछि उनी रियलको ‘बी’ टिमको प्रशिक्षक हुदै सिनियर टोलीको प्रशिक्षक बन्न पुगेका हुन् ।  कासिलास २०१५ मा रियल म्याड्रिड छाडेर पोर्चुगिज क्लब पोर्टाे पुगेका थिए ।

प्रशिक्षण दौरान १ मे २०१९ मा हर्ट अट्याक भएपछि कासिलासले १८ फेब्रुअरी २०२० मा व्यवसायिक खेल जीवनबाट सन्यासको घोषणा गरेका थिए । सन्यासको घोषणा गरेपनि सम्झौता अवधि रहेकाले उनले १ अगस्टमा हुने बेन्फिकाविरुद्धको खेलपछि पोर्टो छोडेको आधिकारिक घोषणा गर्दै म्याड्रिड फर्कनेछन् ।