एजेन्सी – बेल्जियन फरवार्ड रोमेलु लुकाकुले अन्तिम समयतिर पेनाल्टीमार्फत गोल गरेपछि इन्टर मिलान इटालियन सिरी ‘ए’ मा रोमासँगको हारबाट जोगिएको छ ।

इन्टर मिलानले घरेलु टोलीलाई २–२ गोलको बराबरीमा रोक्दै एक अंक लिन सफल भएको हो । रोमाको मैदानमा आइतबार राति भएको खेलमा रोमाका लियोनार्दाे स्पिनाजजोला र हेनरिक मिखतरयानले गोल गरे । इन्टरका स्टेफन डि भर्ज र लुकाकुले गोल गरे ।

खेलको १५औं मिनेटमा स्टेफनको गोलबाट इन्टरले खेलमा अग्रता बनाएको थियो । उनले एलेक्सिस सान्चेजको पासमा गोल गरेका थिए । पहिलो हाफको इन्ज्युरी समयको थप गरिएको पहिलो मिनेटमा लियोनार्दाेले गोल गरेपछि पहिलो हाफ १–१ गोलको बराबरीमा टुंगिएको थियो ।

५७औं मिनेटमा इडेन जेकोको पासमा हेनरिक मिखतरयानले गोल गरेपछि रोमाले खेलमा २–१ को अग्रता लिन सफल भएको थियो । ८८ औं मिनेटमा लुकाकुले पेनाल्टीमार्फत गोल गर्दै खेललाई २–२ गोलको बराबरीमा ल्याए ।

भिक्टर मोसेसले गरेको प्रहार लियोनार्दाेले पेनाल्टी बक्समा ह्यान्ड गरेपछि रेफ्रीले इन्टरलाई पेनाल्टीको मौका दिएको थियो । जसलाई लुकाकुले सदुपयोग गरे । त्यसपछि थप गोल निस्कन नसक्दा खेल २–२ गोलको बराबरीमा सकियो । बराबरीसँगै दोस्रो स्थानमा रहेको इन्टरको ३४ खेलबाट ७२ अंक पुगेको छ । समान खेलबाटै रोमा ५८ अंक जोडेर पाँचौ स्थानमा रहेको छ ।