एजेन्सी – इस्तानबुल बासाकसेरले क्लबको इतिहासमा पहिलोपटक टर्किस सुपर लिगको उपाधि जितेको छ । काइसेरिस्पोरमाथि १–० को झिनो जित निकाल्दै इस्तानबुलले लिगको एक चरणको खेल बाँकी रहँदा टर्किस लिगको उपाधि जित्न सफल भएको हो । 

क्लबको इतिहासमा पहिलोपटक लिग च्याम्पियन बन्ने क्रममा इस्तानबुलले फेनरवाच, गालातासारे र बेसिक्टासजस्ता तीन ठुला क्लबलाई पछि पारेका थिए । अर्काे खेलमा दोस्रो स्थानमा रहेको ट्रावजोन्सपर कोन्यास्परसँग ४–३ ले पराजित भएसँगै इस्तानबुलको उपाधि पक्का भएको हो ।

इस्तानबुलको ३३ खेलबाट ६९ अंक रहेको छ । दोस्रो स्थानको ट्रावजोन्सपरको ६२ अंक रहेको छ । काइसेरिस्पोर ३२ अंक जोडेर १७औं स्थानमा छ ।

इस्तानबुल बासाकसेर टर्किस सुपर लिग जित्ने छैटौ क्लब बन्यो । गालाटासारे (२३), फेनरवाच, (२८) बुरसास्पोर (१) र ट्रावजोन्सवर (६) ले मात्रै टर्किस लिगको उपाधि जितेका छन् । इस्तानबुल बासाकसेर १९९० मा स्थापना भएको क्लब हो ।

इस्तानबुल बासाकसेर २००७/०८ को सिजनमा सुपर लिगमा बढुवा भएको थियो । पछिल्लो दुई सिजन इस्तानबुल बासाकसेर उपविजेतामा सीमित बनेको थियो ।

इस्तानबुलको जितमा मामुट टेकडेमिरले पहिलो हाफमा गरेको गोल नै पर्याप्त बन्यो । ३७औं मिनेटमा इडिन भिस्काले पेनाल्टी चुकाएका थिए । इस्तानबुलबाट प्रिमियर लिगका स्टार रोविन्हो, डेम्वा बा, मार्टिन स्केर्टल र गले क्लिची लगायत खेलाडीले खेलेका थिए ।