ललितपुर (हाम्रो खेलकुद)– अर्थोप्लास्टले राष्ट्रिय टोलीको कप्तानी समेत गरिरहेका गोलकिपर किरण चेम्जोङलाई आफ्नो ब्रान्ड एम्बेसडर नियुक्त गरेको छ । अर्थोप्लास्ट रिह्याबलिटेसन सेन्टरले एक वर्षका लागि उनलाई ब्रान्ड एम्बेसडर बनाएको हो ।

किरण र अर्थोप्लास्टका प्रबन्ध निर्देशक हरि तामाङबीच ग्वार्कोस्थित अर्थोप्लास्टमा शनिबार सम्झौता पत्रमा हस्ताक्षण भएको हो । सम्झौता अनुसार किरण र उनको परिवारका अन्य सदस्यलाई अर्थोप्लास्टले एक वर्षमा २ लाख रुपैयाँ बराबरको आफ्नो सेवा उपलब्ध गराउने छ । त्यस्तै आफुमार्फत सेवा वा उपचारका लागि किरण वा उनको परिवारको सदस्यलाई अन्यत्र ल्याबमा पठाउँदा ५० प्रतिशत छुटको व्यवस्था पनि अर्थोप्लास्ट गर्ने सम्झौता रहेको बताइएको छ ।

त्यस्तै अर्थोप्लास्ट कुनै पनि खेलका खेलाडीलाई फेजियोथेरापीलागयत अन्य आफ्नो सुविधामा ३० प्रतिशत र राष्ट्रिय खेलाडीको हकमा थप १० प्रतिशत छुट दिने घोषणा पनि गरेको छ । भलिबल खेलाडी प्रतिभा माली र बास्केटबल खेलाडी सविता खड्कापनि घुँडाको शल्यक्रियापछि अर्थोप्लास्टमा फिजियोथेरापी गराइरहेकी छिन् ।

किरण भारतको पन्जाब एफसीबाट व्यवसायिक फुटबल खेल्दै आएका छन् । कोभिड १९ का कारण आइ लिगको पुरा खेल नहुँदै स्थगित भएको थियो । किरण सरकारले चैत ११ गते लकडाउन गर्नु केहि दिन अघि मात्र स्वदेश फर्केका थिए । त्यसता उनी इमाडोलस्थित घरमै रहँदै आएका छन् ।

अखिल नेपाल फुटबल संघ (एन्फा) ले असोजमा घरेलु मैदानमा आयोजना हुने विश्व कप छनोटका भदौ १ गतेबाट प्रशिक्षण सुरु गर्ने तयारी गरिरहेको छ । जसमा किरणसहित ३४ खेलाडी डाकिएका छन् । अधिकांश खेलाडी सम्पर्कमा आइसकेको एन्फाले जनाएको छ ।

काठमाडौं उपत्यकामा घर भएका वा डेरा गरि बस्ने खेलाडीलाई आफ्नैमा र अन्य खेलाडीलाई भने एन्फाले केहि दिन होटलमा राख्ने जनाएको छ । पिसिआर परिक्षण र त्यसको परिणामपछि एन्फाले आफ्नै होस्टलमा खेलाडीलाई क्वारिन्टिन राख्ने जनाएको छ । त्यसपछि मात्र औपचारिक रुपमा टोलीको प्रशिक्षण सुरु हुने बताइएको छ ।