काठमाडौँ (हाम्रो खेलकुद) – रानीपोखरी कर्नर टिम (आरसिटी) राजधानीमा जारि ‘बि’ डिभिजन लिग फुटबल प्रतियोगिताको अंक तालिकाको शिर्ष स्थानमा उक्लिएको छ।
आज हल्चोकस्थित एपीएफ रंगशालामा भएको खेलमा खुमलटारलाई २-१ले पराजित गर्दै ६ अंक बोकेको आरसिटी शिर्ष स्थानमा उक्लिएको हो। पुकार आले मगरको ७०औं मिनेटको गोलले अग्रता लिएको आरसिटीका लागि बिदुर रिजालले ९०औं मिनेटमा अग्रता दोब्बर पारेका थिए। ९०+३ मिनेटमा सुरज राउतले खुमलटारको लागि गोल गरेपनि खुमलटार खाली हात फर्किन बाध्य भयो।
दिनको अर्को खेलमा एनआरटि र मध्यपुर युथ एसोसिएसनले १-१को बराबरी खेले। सुबर्ण बिक्रम कार्कीको ५३औं मिनेटको गोलले जितको नजिक पुगेको मध्यपुरले ९०+३ मिनेटमा राकेश गुरुङको पेनाल्टी गोलका कारण अंक बाढ्नु पर्यो।
