एसीयाली फुटबल महासंघ (एएफसी)को अपिल कमिटीले म्याच फिक्सिङको आरोपमा नेपाली खेलाडी माथि गरिएको आजिवन प्रतिबन्ध कारबाही माथी परेको पुनरावलोकनको आग्रहलाई खारेज गरिदिएको छ ।
एएफसीको अपिल कमिटीको आज बसेको बैठकले चार जना खेलाडी र एक जना प्रशिक्षकलाई एएफसीले लगाएको प्रतिबन्ध विरुद्धको अपिललाई खारेज गरेको हो । एएफसीको अनुशासन कमिटीले नेपालका राष्ट्रिय फुटबल टिमका सदस्यहरू विकास सिंह क्षेत्री, सन्दीप राई, रितेश थापा र सागर थापाले म्याच फिक्सिङमा संलग्न रहेको भन्दै गत बर्षको डिसेम्बरमा आजिवन फुटबल खेल्न प्रतिबन्ध लगाउने निर्णय गरेको थियो ।
नेपालले सन् २००८ देखी २०१२ को समयमा खेलेका अन्तर्राष्ट्रिय मैत्रिपुर्ण म्याचमा म्याच फिक्सिङ्ग आशंकामा एएफसीले स्पोर्टस राडर सेक्युरेटी र नेपाल प्रहरीसंग मिलेर अनुसन्धान गरेको थियो । म्याच फिक्सिङ्गमा चार खेलाडी र एक प्रशिक्षकको मिलोमतो प्रमाणित भएपछि एएफसीले आजिवन फुटबल गतिविधीमा संलग्न हुन नपाउने गरि प्रतिबन्ध लगाएको हो ।
-इकान्तिपुरबाट साभार
