एजेन्सी – पेरिस सेन्ट जर्मेन (पीएसजी) ले एटलान्टाविरुद्ध अन्तिम समयमा गोल नगरेको भए क्लबको लागि यो सिजन विगतका सिजनझैं सामान्य रहने थियो । खेलको १ मिनेट बाँकी रहँदा पनि प्रतियोगिताबाट बाहिरिने पक्काजस्तो देखिएको पीएसजी अन्तिम समयमा दुई गोल गर्दै जोगियो ।

पीएसजीका लागि मार्किन्हसले ९० औ मिनेटमा र एरिक माक्सिम चुपो मोटिङले इन्ज्युरी समयमा गोल गर्दै अन्तिम चारमा स्थान पक्का गरे । यद्यपि पीएसजीलाई खेलमा फर्काउन भने ब्राजिलियन फरवार्ड नेयमार र फ्रान्सेली युवा किलीयन एमबाप्पेको भूमिका महत्त्वपूर्ण थियो ।

पीएसजीले यूईएफए च्याम्पियन्स लिगको सेमिफाइनलमा मंगलबार आरबी लाइप्जिगको सामना गर्दैछ । पहिलो पटक फाइनल पुग्ने प्रयासमा रहेका दुई टोलीबीचको प्रतिस्पर्धा निकै रोमान्चक हुने अपेक्षा गरिएको छ । धेरैको नजर उपाधि दाबेदारको रुपमा रहेको पीएसजीमा रहनेछ । यता एकपछि अर्को टोलीलाई स्तब्ध पार्दै आएको लाइप्जिगलाई पनि कमजोर आँक्न मिल्दैन ।

सन् २०११ मा कतारी मालिकले टोलीको स्वामित्व खरिद गरेपछि पीएसजीले च्याम्पियन्स लिगलाई आफ्नो प्रमुख लक्ष्य बनाउँदै आएको छ । तर टोलीले क्वाटरफाइनल चरण पार गर्न नै सकेन । झन्डै साढे २ दशकपछि इतिहासमै दोस्रो पटक पीएसजी यस चरणसम्म आइपुगेको छ । यसक्रममा पीएसजीले घरेलु फुटबलमा २४ उपाधिको लागि प्रतिस्पर्धा गर्दा ७ लिगसहित १८ पटक उपाधि जित्यो ।

सन् १९९४-९५ पछि पीएसजी पहिलो पटक सेमिफाइनल पुगेको छ । कतारी मालिक आएपछि सुरुवाती ४ सिजन क्वाटरफाइनलमा रोकिएको पीएसजी त्यसपछि भने लगातार तीन सिजन अन्तिम १६ मै रोकियो । सन् २०१७ मा बार्सिलोना र पछिल्लो सिजन म्यानचेस्टर युनाइटेडविरुद्धको हारले टोलीलाई थप पिडा दिएको छ ।

पीएसजीले एटलान्टाविरुद्ध गोल नगर्दासम्म इतिहास फेरी दोहोरिने देखिएको थियो । तर त्यसो भएन । यो पीएसजी विगतको तुलनमा फरक छ । त्यो पछिल्लो नतिजाले पनि पुष्टि गरेको छ । समूह चरणमा रियल म्याड्रिड रहेको समूहमा ५ जित र १ बराबरीसहित शीर्षस्थानमा रहेको पीएसजीले अन्तिम १६ मा डर्टमुन्डसँग पहिलो लेगमा हारेपनि पुनरागमन जित दर्ता गर्यो । त्यसपछि एटलान्टासँग जितले टोलीको मनोबल पनि बढेको छ ।

सन् २०१७ मा पीएसजीले विश्व कीर्तिमानी २ सय २२ मिलियन युरोमा नेयमारलाई अनुबन्धन गर्यो । लगत्तै एमबाप्पे पनि १ सय ८० मिलियन युरोमा पीएसजी आइपुगे । तर पछिल्लो दुवै सिजन च्याम्पियन्स लिगको मुख्य खेलमा नेयमार चोटका कारण उपस्थित थिएनन् । नेयमार अनुपस्थित हुनु पनि पीएसजी चुक्नुको कारण मानिएको थियो ।

यसपटक पनि एमबाप्पे चोटका कारण खेल्न नपाउँदा पीएसजी बाहिरिने डर थियो । तर प्रशिक्षक टुचेलले उनलाई दोस्रो हाफमा मैदान प्रवेश गराए र त्यसको फलस्वरुप खेलमा पीएसजी पुनरागमन गर्न सफल भयो । यसपटक लिग वन रद्द भएर पनि पीएसजीका खेलाडीले उचित विश्राम पाएका छन् । लियोनको प्रदर्शनले पनि त्यसलाई थप पुष्टि गरेको छ ।

पीएसजीले चाहेर पनि सेमिफाइनलमा यति सहज खेल पाउने थिएन । लाइप्जिग पहिलो पटक प्रतियोगिताको अन्तिम चारसम्म आइपुगेको हो । यस सिजनअघि लाइप्जिगले च्याम्पियन्स लिगमा मात्र २ खेल जितेको थियो । मुख्य फरवार्ड टिमो वेर्नर नै क्लबमा नहुनुले पीएसजीलाई सहयोग हुनेछ ।

एटलेटिको म्याड्रिडलाई पराजित गरेपनि लाइप्जिगको प्रदर्शन सन्तोषजनक मात्र थियो । पीएसजीले आफ्नो स्तरअनुसार प्रदर्शन गरे खेल कठिन हुने छैन । इतिहास रच्ने संघारमा रहेकाले पीएसजीलाई केहि दबाब हुनेछ नै, यता लाइप्जिग भने त्यसलाई अवसरको रुपमा लिने दाउमा हुनेछ । नेयमार र एमबाप्पेसहित पीएसजीलाई पनि यो खेल अग्निपरीक्षा नै हुनेछ ।

यो पनि :

पीएसजी विरुद्ध लाइप्जिग : प्रशिक्षक गुरु-चेलाको भिडन्त

पीएसजी र लाइप्जिगको पहिलोपटक फाइनल पुग्ने लक्ष्य