लेस्टर (एजेन्सी) – लेस्टरले प्रिमियर लिगको जारी सिजनमा पहिलो जित हासिल गर्ने क्रममा शनिबार स्वान्सीलाई २–१ ले हराएको छ । साविक विजेता रहेको लेस्टरलाई जित दिलाउन स्ट्राइकर जेमी भार्डे र कप्तान वेस मोर्गानले गोल गरेका थिए ।
रियाद मेराजले ५६ औं मिनेटमा पेनाल्टीमा गोल गर्न सकेको भए लेस्टरको गोलअन्तर अझै बढ्ने थियो । तर ५६ औं मिनेटमा उनको पेनाल्टी विपक्षी गोलकिपरले जोगाएका थिए । जेमीले ३२ औं र मोर्गानले ३२ औं मिनेटमा गोल गरेका थिए । ३ खेलमा पहिलो जित हासिल गरेको लेस्टरको ४ अंक पुगेको छ । टोली अंक तालिकाको नवौं स्थानमा पुगेको छ ।
शनिबारकै अन्य खेलमा चेल्सीले लगातार तेस्रो जित हासिल गर्ने क्रममा चेल्सीले बुम्लीलाई ३–० ले विजयी भएको छ । इडन हेजार्डले नवौं मिनेटमा पहिलो गोल गरेको खेलमा विलियनले ४१ औं र खेल सकिन एक मिनेटअघि भिक्टोर मोसेसले गोल गर्दै टोलीर्ला सहज जित दिलाएका थिए । ३ खेलमा सतप्रतिशत नतिजा निकाल्दै चेल्सी अंक तालिकाको शीर्षस्थामा पुगेको छ । अर्को खेलमा आर्सनलले वाटफोर्डलाई ३–१ ले हराएको छ । आर्सनलले पहिलो हाफमै तीन गोल गरेको थियो । सान्टी काजोर्लाले नवौं, एलेक्स सान्चेजले ४० औं र मेसुट ओजिले ४५ औं मिनेटमा गोल गरेका थिए । वाटफोर्डका लागि रोर्बेटो पेरेयराले दोस्रो हाफमा एक गोल फर्काएका थिए । ४ अंकका साथ आर्सनल सातौं स्थानमा छ ।
शनिबार भएको पहिलो खेलमा लिभरपुल र टोटनह्यामले १–१ को बराबरी खेलेका छन् । अन्य खेलमा एभर्टनले स्टोकलाई १–० ले हरायो भने क्रिस्टल प्यालेस र एएफसी बार्नेमाउथले तथा साउथ ह्याम्टन र सन्डरल्यान्डले समान १–१ को बराबरी खेलेका छन् ।
