एजेन्सी – इंग्लिस क्लब आर्सनलले दोस्रो सिजन पनि स्पेनिस क्लब रियल म्याड्रिडका मिडफिल्डर ड्यानी सेवालोसलाई लोनमा आर्सनलमै अनुबन्ध गर्ने भएको छ ।

यस विषयमा दुवै क्लबबीच सहमति भइसकेको र सम्झौतामा नयाँ विषय केही पनि समावेश गरिएको छैन । दुवै क्लबबाट आधिकारिक निर्णय आउन बाँकी छ । २४ वर्षीय मिडफिल्डर सेवालोस गत सिजन लोनमा आर्सनल पुगेको थिए । उनले त्यहाँ अघिल्लो सिजन ३७ खेलमा मौका पाउदा उत्कृष्ट प्रदर्शन गरेका थिए ।

त्यसैले पनि आर्सनलले सेवालोसलाई पुनः क्लबमै राख्ने निर्णय गरेको हो । सेवालोस सोमबार रियल म्याड्रिडको प्रशिक्षणमा सामेल भएका थिए । सेवालोस लन्डन फर्केर औपचारिक प्रक्रिया पूरा गर्दैछन् ।

रियल आफ्ना मिडफिल्डरलाई अझै पनि आफ्नो टोलीमा राख्न चाहन्छ । सेवालोसले पनि सान्टियागो बर्नाबेउमा खेल्ने सपना त्यागेका छैनन् । तर, उनले अझै पनि रियलमा नियमति खेल्न पाउने बुझेका छैनन् । सेवालोसको मनपर्ने गन्तव्य पनि आर्सनल नै हो । उनले मिकेल अर्टेटाबाट आफ्नो प्रदर्शनमा थप निखारता ल्याउन सक्ने बुझेका छन् ।

सेवालोस रियलबाट बाहिरिने पछिल्लो खेलाडी हुनेछन् । रियलबाट यसअघि रेनिएर जेसस जर्मन क्लब बोरुसिया डर्टमुन्डमा तथा ताकेफुसा कुवो स्पेनिस क्लब भिल्लारियलमा लोनमा अनुबन्धित भइसकेका छन् ।

ब्राहिम डियाज लोनमा इटालियन क्लब एसी मिलान र हामेस रोड्रिग्वेज इंग्लिस क्लब एभर्टनमा स्थायी रुपमा जाने अन्तिम तयारीमा छ । आधिकारिक पुष्टि हुन बाँकी छ ।