एजेन्सी – फ्रान्सेली च्याम्पियन पेरिस सेन्ट जर्मेन (पीएसजी) का थप तीन जना खेलाडीमा कोरोना संक्रमण पुष्टि भएको छ ।

दुई दिनअघि ब्राजिली स्टार नेयमारसहित थप दुई खेलाडीमा कोरोना पुष्टि भएपछि अन्य खेलाडी तथा पदाधिकारीको कोरोना परिक्षण गर्दा थप तीन खेलाडीमा कोरोना पुष्टि भएको हो । पीएसजीले विज्ञप्ति जारी गर्दै पछिल्लोपटकको कोरोना परिक्षणमा थप तीन खेलाडीमा कोरोना पुष्टि भएपनि नाम भने गोप्य नै राखेको छ ।

तर फ्रान्सको ले’एकिपेले क्लब स्रोतलाई उदृत गर्दै पछिल्लोपटक गोलरक्षक केलर नाभास, डिफेन्डर मार्किन्हस र फरवार्ड मोउरो इकार्डीमा कोरोना पुष्टि भएको दावी गरेको छ ।

एक साताको बीचमा ६ जना खेलाडीमा कोरोना पुष्टि भएसँगै पीएसजीको नयाँ सिजनको यात्रा थप अन्योलता बढेको छ । कोरोना पुष्टि भएका सबै ६ खेलाडी क्वारेन्टिनमा बसिसकेका छन् । अगस्ट अन्तिम साता च्याम्पियन्स लिगको फाइनलपछि खेलाडीहरुले विश्राम पाउदा छुट्टी मनाउन स्पेनको इबिजा बिचमा पुगेका थिए ।

फ्रान्सेली लिगको नियम अनुसार अब पीएसजीको लिग खेल पनि स्थगित हुने सम्भावना बढेको छ । लिगको नियम अनुसार ८ दिनको अन्तरमा ४ भन्दा बढी खेलाडीमा कोरोना संक्रमण देखिए खेल स्थगित गर्नुपर्ने छ ।

भर्खरै च्याम्पियन्स लिग खेलेका कारण पीएसजीको सिजनको पहिलो खेल सेप्टेम्बर १० लाई सारिएको थियो । पीएसजीले लेन्ससँग खेल्दै फ्रेन्च लिग वानको सुरुवात गर्ने तालिका रहेको छ । तर, अब यो नहुने सम्भावना बढेको छ ।