एजेन्सी – बार्सिलोनाका सुपर स्टार लियोनल मेस्सीको सम्भावित बर्हिगमनलाई रियल म्याड्रिडका मिडफिल्डर लुका मोड्रिचले रियलले क्रिस्टियानो रोनाल्डोलाई गुमाएको प्रसंगसँग तुलाना गरेका छन् ।

पोर्चुगिज सुपर स्टार रोनाल्डो रियल छाडेर सन् २०१८ मा इटालियन टोली युभेन्ट्समा आबद्ध भएका थिए । त्यो सिजन रियलको सन्तोषजनक हुन सकेन । यद्दपी टोलीले युरोपियन सुपर कप भने जितेको थियो । रोनाल्डो विना पनि पछिल्लो सिजनमा भने रियलले सुधारिएको प्रदर्शन गरेको थियो । गत सिजन रियलले ला लिगासहित सुपरकोपा डे स्पाना जितेको थियो ।

‘त्यो ठूलो घाटा हुनेछ । जस्तो रोनाल्डोले छाड्दा भएको थियो । तर हामीले बितेका विषयमा धेरै सोच्नु हुँदैन । यो फुटबल हो, यसमा यो स्वभाविक हो,’ मोड्रिचले भने,’ यदि उनका सरुवा भयो भने त्यो लिगका लागि पनि ठूलो घाटा हो । तर हामीले अघि बढ्नु पर्छ । अन्य खेलाडी स्टार भएर आउँनेछन् ।’

रियलबाट रोनाल्डोले छाड्दा जस्तो हो बार्सिलोनाबाट मेस्सी जाँदा त्यस्तै हुने मोड्रिचको अनुमान छ । उनले थपे, ‘रोनाल्डो विना रियल जस्तो भयो । मेस्सी विना बार्सिलोना पनि त्यस्तै हुन्छ ।’

मोड्रिचले नयाँ सिजनमा रियलले अझै राम्रो गर्ने विश्वास लिएका छन् । ‘हामीसँग युवा टोली छैन, तर अनुभव टोली छ । हामीसँग युवा खेलाडी छन्, जो भविष्यमा राम्रो हुनेछन्,’ मोड्रिचले अगाडि भने, ‘नयाँ खेलाडी किन्दा पनि त्यस्तै हो । हामीसँग पर्याप्त क्षमता छ । हामीले ला लिगामा देखाइसकेका छौं र फेरि त्यहि दोहोराउन सक्छौं ।’

कोरोना भाइरसका कारण केहि महिना स्थगित भएर सुरु भएको लिगमा रियल उच्च मनोबलका साथ उत्रेको मोड्रिचले स्मरण गरे । ‘हामीले फुटबल मिस गरेका थियौं । जितलाई मिस गरेको थियौं, ‘ उनले सम्झिए, ‘हामीले मेहनत गर्यौं । शारीरिक रुपमा लिगमा हामी उत्कृष्ट टोली थियौं । जसका कारण हामी जित्न सफल भयौं । त्यो मेरो दोस्रो लिग उपाधि थियो । म अझै बढी जित्न चाहन्छु ।’