काठमाडौँ (हाम्रो खेलकुद) – राजधानीमा भदौ ५ गतेबाट सुरु भएको ‘बि’ डिभिजन लिगमा सबै टोलीले तेश्रो चरणको खेल खेलिसकेका छन् र लिगमा ५ दिनको विश्राम चलिरहेको छ।
चार खेल खेलेको न्यु रोड टिम (एन.आर.टि) दश अंकका साथ अग्रस्थानमा छ भने आर.सी.टि. ८ अंक बोकेर दोश्रो स्थानमा रहेको छ। लिगको अन्तिम स्थानमा भने कुनै अंक नजोडेको सामाजिक युवा क्लब रहेको छ। महाबिर र नयाँबस्ति एक अंक बोकेर अन्तिम तिनको स्थानमा बसेका छन्।
पहिलो खेलमा सामाजिकले एन.आर.टिसंग ६-१को हार व्यहोर्यो भने दोश्रो खेलमा अग्रता लिने पेनाल्टी चुकाउँदा ब्वाइज युनियन क्लबसंग ३-०ले स्तब्ध हुन पुग्यो। पुल्चोकले तेश्रो खेलमा ३-१ले पराजित गर्दै सामाजिकलाई खाता खोल्ने मौका दिएन।
लिगको एक चौथाई भाग सकिसक्दापनि कुनै अंक हासिल गर्न नसकेको र प्रदर्शन पनि सन्तोषजनक हुन नसकेको सामाजिक युवा क्लबमाथि रेलिगेसन पर्ने डर मौलाएको छ।
