एजेन्सी – प्रिमियर लिग प्रतिद्धन्द्धी लेस्टर सिटीलाई पराजित गर्दै लन्डन क्लब आर्सनल इंग्लिस फुटबल लिग कप (इएफएल) अर्थात कारबाओ कपको चौथो चरणमा प्रवेश गरेको छ ।

आर्सनलले लेस्टर सिटीलाई उसकै मैदानमा २–० ले पराजित गर्दै चौथो राउन्डमा प्रवेश गर्न सफल भएका हुन् । किङ पावर स्टेडियममा प्रतिस्पर्धात्मक बनेको खेलमा दुवै गोल दोस्रो हाफमा सम्भव भएको थियो ।

खेलको सातौ मिनेटमा लेस्ट सिटीका केलिचीको प्रहारलाई आर्सनलका गोलरक्षक बन्र्ड लेनोले विफल पारे । २८औं मिनेटमा आर्सनलले पेनाल्टी अपिल गरेपनि रेफ्रीले मतलव नै गरेनन् । ३१औं मिनेटमा रेइस नेल्सनले सुवर्ण अवसर पाएपनि सदुपयोग गर्न नसक्दा आर्सनल अग्रता लिनबाट चुक्यो । ४०औं मिनेटमा जेम्स म्याडिसनको प्रहार पोस्टमा लागेर फर्कदा लेस्टर अग्रता लिनबाट चुक्यो ।

५७औं मिनेटमा आर्सनलले आत्मघाती गोलबाट अग्रता लियो । निकोलस पेपेको प्रहारलाई लेस्टरका गोलरक्षक ड्यानी वार्डले बचाएपनि रिवाउन्डकै अवस्थामा क्रिस्टियन फुचलाई लाग्दै गोलमा परिणत भएको थियो ।

७४औं मिनेटमा इडवार्ड केथियाको प्रहारलाई वेस मोर्गानले गोललाइनबाट बचाउदा आर्सनल अग्ता दोब्बर पार्नबाट चुक्यो । ८१औं मिनेटमा मार्क अलब्राइटनको फ्रिकिमा हम्जा चौधरीले अवसर पाएपनि सदुपयोग गर्न नसक्दा लेस्टर बराबरीबाट चुक्यो ।

९०औं मिनेटमा इडवार्ड केथियाले गोल गर्दै आर्सनलाई २–० को जित दिलाए । उनले हेक्टर बेलरिनको मिलाइदिएको पासमा गोल गर्न सफिल भएका थिए ।