एजेन्सी – फ्रान्सेली लिग अन्तर्गत अघिल्लो साता पेरिस सेन्ट जर्मेन (पीएसजी) र मार्सेबीचको खेलमा भएको घटनामा मिडफिल्डर एन्जल डी मारिया पनि प्रतिबन्धमा परेका छन् ।

निकै तनावपूर्ण खेलमा रेफ्रीले ५ रातो कार्ड र १२ पहेंलो कार्ड देखाएका थिए । दुई टोलीका खेलाडीबीच घम्साघम्सी हुँदा रेफ्रीले हात हालेका खेलाडीलाई कार्ड देखाएका थिए । पछि अनुशासन समितिले कार्ड प्राप्त गर्ने खेलाडीलाई थप कारवाही गरेको थियो । थप अध्ययनपछि समितिले दि मारियालाई पनि ४ खेलको प्रतिबन्ध सुनाएको छ ।

डी मारियाले मार्सेका डिफेन्डर अल्भारो गोन्जालेजलाई थुकेको आरोप प्रशिक्षक आन्द्रे भिलास बोसले लगाएका थिए । यद्यपि लिगले सजाय सुनाउँदा थुकेको बारेमा केहि उल्लेख गरेको छैन । समितिले नेयामारले अल्भारोमाथि लगाएको रंगभेदको आरोपबारे भने अझै छानविन गरिरहेकोअ छ । सेप्टेम्बर ३० मा बस्ने बैठकले यसबारे विस्तृत निर्णय गर्नेछ ।

यसअघि अनुशासन समितिले नेयमारलाई रातो कार्डको एक खेल प्रतिबन्धमा थप एक खेल प्रतिबन्ध लगाएको थियो । यसबाहेक समितिले नेयमारले प्रतिबन्ध पूरा भएपछि पुनरागमन गरेको खेलमा पनि सोहि व्यवहार देखाएमा स्वत: एक खेल प्रतिबन्ध थपिने निर्णय पनि गरेको छ ।

पीएसजीका मिडफिल्डर पारेडेसले पनि थप एक खेल तथा मार्से डिफेन्डर जोर्डन अमाभीलाई खुट्टाले हानेका पीएसजीका डिफेन्डर लेभिन कुर्जावाले भने ६ खेल प्रतिबन्ध भोगिरहेका छन् । अमाभीले पीएसजीका खेलाडीलाई मुक्का हानेपछि कुर्जावाले जवाफमा लात हानेका थिए । मार्सेका अमाभीलाई पनि ३ खेल प्रतिबन्ध लगाइएको छ । मार्सेका फरवार्ड डारियो बेनडेट्टोले पनि २ खेल प्रतिबन्धमा छन् ।