एजेन्सी – क्याटलान क्लब बार्सिलोना छोडेर एटलेटिको म्याड्रिड गएका फरवार्ड लुइस सुआरेजले पहिलो खेलमा सानदार प्रदर्शन गरेपनि दोस्रो खेलमा भने त्यसलाई निरन्तरता दिन सकेनन् ।

आइतबार भएको खेलमा ग्रानडाविरुद्ध डेब्यु गर्ने क्रममा सुआरेजले मैदानमा जम्मा २० मिनेट बिताएपनि २ गोल र १ असिस्ट प्रदान गरेका थिए । उनी खेलको ७० औं मिनेटमा डिएगो कोस्टाको स्थानमा मैदान प्रवेश गरेका थिए । प्रशिक्षक सिमिओनीले बुधबार भएको लिग खेलमा हुएस्काविरुद्ध पहिलो रोजाइमा उतारेपनि सुआरेजले प्रभाव जमाउन सकेनन् ।

एटलेटिको लिगको दोस्रो खेलमा भने गोलरहित बराबरीमा रोकिँदै अंक बाँड्न बाध्य भयो । यसै सिजन माथिल्लो श्रेणीमा बढुवा भएको टोलीको मैदानमा एटलेटिकोले सहज जित आत्मसात गर्ने अनुमान रहेको थियो । तर आक्रमणमा फितलो प्रदर्शन भएपछि म्याड्रिड टोलीले ३ अंक जोड्न सकेन ।

पहिलो पटक सुरुवाती ११ मा खेल्दा सुआरेजलाई तालमेल मिलाउन पनि कठिन भएको थियो । विंगर भिटोलोले खेलमा पाएको सुवर्ण अवसर खेर फाल्दा टोलीले अग्रता लिन चुकेको थियो । जोआओ फेलिक्ससँग पनि सुआरेजको समझदारी मिल्न सकेको थिएन । फेलिक्सको पासलाई सुआरेजले नियन्त्रणमा लिन नसक्दा गोल गर्ने अवसर चुकेको थियो ।

सुआरेज खेलको ६२ औं मिनेटमा बाहिरिएका थिए । प्रशिक्षक सिमिओनीले उनको स्थानमा डिएगो कोस्टालाई मैदान छिराएका थिए । सिमिओनीले हालसम्म कोस्टा र सुआरेज दुवैलाई एकसाथ भने खेलाएका छैनन् ।