एजेन्सी – इंग्लिस फरवार्ड ह्यारी केनले ह्याट्रिक प्रहार गरेपछि टोटेनहम हट्सपरले युरोपा लिग छनोटको प्लेअफ खेलमा मक्काबी हाइफालाई ७-२ को फराकिलो अन्तरले पराजित गरेको छ ।

टोटेनहमले खेलको दोस्रो मिनेटमा नै केनको गोलमा अग्रता लिएको थियो । बेन डेभिसको क्रसमा केनले ६ यार्ड बक्स भित्रबाट सहजै गोल गरे । १७ औं मिनेटमा जारोन चेरीले झन्डै २५ यार्ड टाढाबाट सानदार गोल गर्दै खेल बराबरीमा ल्याए । तर त्यसको ३ मिनेटपछि नै टोटेनहमले लुकास मोउराको गोलमा अग्रता लियो ।

३६ औं मिनेटमा जिओभानी लो सेल्सोले गोल गर्दै अग्रता दोब्बर पारे । पेनाल्टी क्षेत्रभित्र पाहुना टोलीका खेलाडीले बल क्लियर गर्न नसक्दा डेभिसले मिलाइदिएको पासमा लो सेल्सोले पहिलो टचमा नै गोल गरे । त्यसको तीन मिनेट नबित्दै लो सेल्सोले व्यक्तिगत दोस्रो गोल थपे । केनले मिलाएको पासलाई उनले पहिलो टचमा नियन्त्रण लिँदै गोलरक्षकको टाउको माथिबाट गोलमा परिणत गरे ।

दोस्रो हाफको सुरुवातमा हाइफाले पेनाल्टी पायो । म्याट डोहर्टिले पेनाल्टी क्षेत्रभित्र ह्यान्ड गरेपछि रेफ्रीले दिएको पेनाल्टीमा निकिता रुकविस्ताले गोल गर्दै गोलको अन्तर घटाए । तर ४ मिनेटपछि टोटेनहमले पनि ह्यान्डबलकै कारण पेनाल्टी पायो । केनले पेनाल्टीलाई सहजै गोलमा परिणत गरे ।

खेलको ७४ औं मिनेटमा केनले आफ्नो ह्याट्रिक पूरा गरे । स्टिभन बर्गवाइनको पासलाई पहिलो टचमा नै गोलरक्षकको टाउको माथिबाट चिप गर्दै केनले ६-२ को अग्रता दिलाए । दोस्रो हाफमा मैदान छिरेका डेले अलीले इन्ज्युरी समयमा अर्को गोल थपे । पेनाल्टी क्षेत्रभित्र डेलेलाई लडाएपछि उनी आफैंले प्राप्त पेनाल्टीमा गोल गरेका थिए ।

यस जितसँगै टोटेनहमले युरोपा लिगको समूह चरणमा स्थान बनाएको छ । समूह चरणको ड्र शुक्रबार न्योनस्थित यूईएफए मुख्यालयमा हुँदैछ ।