एजेन्सी – २४ पेनाल्टी भएको खेलमा जित निकाल्दै इटालियन क्लब एसी मिलानले पोर्चुगिज क्लब रियो एभेलाई पराजित गर्दै युइएफए युरोपा लिगको समूह चरणमा स्थान बनाएको छ ।

पोर्चुगलमा बिहीबार सात भएको खेलमा घरेलु टोलीलाई सडनडेथमा ९–८ ले पराजित गर्दै मिलानले युरोपा लिगको समूह चरणमा स्थान पक्का गरेको हो ।

निर्धारित समयको खेल १–१ को बराबरी तथा अतिरिक्त समयको खेल २–२ गोलको बराबरी भएपछि खेलको निर्णय पेनाल्टी सुटआउटबाट लिइएको हो । जसमा मिलानले बाजी मार्यो ।

मिलानका इस्माइल बेन्नासेर, सिमोन, थियो हर्नान्डेज, ब्राहिम डियाज, हकान कलहानोग्लु, डाभिड कालाब्रिया, सान्ड्रो टोनाली र राफयल लिएओले गोल गर्दा लोरेन्जो कोलोम्वो र जियानलुजी डोननररुम्मा गोल गर्न चुके ।

एभेका चिको जेराल्डेस, एडरलान सान्तोस, निकोलो जम्वोर, लुकास पियाजन, फिलिपे अगुस्टो, गेल्सन, ग्याब्रिलजिन्हो र इभो पिन्टोले गोल गर्न सके । नेल्सन मोन्टे र पावेल इिसजिकले गोल गर्न सकेनन् । त्यसपछि मिलानका इस्माइल बेन्नासेर गोल गर्न चुके । एभेका चिको जेराल्डेस पनि चुके ।

मिलानका सिमोनले गोल गर्दा एभेका एडरलान सान्तोस चुकेपछि मिलान विजयी हुन सफल भयो । त्यसअघि प्रतिस्पर्धात्मक बनेको खेलको पहिलो हाफ गोलरहित बराबरीमा सकिएको थियो । ५१औं मिनेटमा एलेक्सिस सएलमेकर्सको गोलबाट मिलानले खेलमा अग्रता लिएको थियो ।

७२औं मिनेटमा चिको जेराडलेसले गोल गर्दै खेललाई १–१ गोलको बराबरीमा ल्याए । त्यसपछि थप गोल नहुदा खेल अतिरिक्त समयमा लम्बिएको थियो । अतिरिक्त समयको पहिलो मिनेटमा गेल्सनले गोल गरेपछि घरेलु टोली एभेले खेलमा २–१ को अग्रता लिन सफल भयो ।

तर, इन्ज्युरी समयमा घरेलु टोली सम्हालिन नसक्दा मिलानले पेनाल्टीमार्फ गोल गर्दै खेललाई पेनाल्टीमा धकेले । १२०औं मिनेटमा एभेका टोनी बोरेभकोभिकले पेनाल्टी बक्सका ह्यान्ड गरेपछि रेफ्रीले मिलानलाई पेनाल्टी प्रदान गरेका थिए । जसमा हकान कलहानाग्लु चुकेनन् र खेललाई २–२ को बराबरीमा ल्याएका थिए ।