एजेन्सी – स्पेनिस ला लिगा अन्तर्गत सेल्टा भिगोविरुद्ध १० खेलाडीमा सिमित भएर पनि जित हासिल गरेकोमा बार्सिलोना प्रशिक्षक रोनाल्ड कोम्यानले खुसी व्यक्त गरेका छन् ।

डिफेन्डर क्लिमेन्ट लेन्गलेटले दोस्रो पहेलो कार्डपछि रातो कार्डको सामना गरेपछि बार्सिलोना पहिलो हाफको अन्त्यतिर नै १० खेलाडीमा सिमित भएको थियो । त्यसका बावजुद बार्सिलोना ३–० विजयी भएको थियो । नयाँ सिजनमा बार्सिलोनाले २ खेलमा शतप्रतिशत सफल नतिजा निकालेको थियो ।

डेनिस सुआरेजलाई फाउल गरेपछि लेन्गलेटले दोस्रो पहेलो कार्डको सामना गर्नुपरेको थियो । ‘हामीले त्यो पहेलो कार्ड थियो की थिएन त्यसमा बहस गरेनौं । त्यो साच्चै कडा सजाय थियो । रेफ्री भएर काम गर्न कठिन छ’, उनले भने, ‘त्यो निर्णय थियो जसमा हामीले बहस गर्नु ठिक हुँदैन । एक खेलाडी कम भयौं भन्दा पनि बाँकी समयका बारेमा कुरा गर्नु बढी महत्वपूर्ण थियो ।’

सेल्टा भिगो विरुद्धको खेलमा टोलीप्रति आफुलाई गर्व लागेको कोम्यानले बताएका छन् । ‘एक खेलाडी कम हुनाका वावजुद हामीले अनुशासनका साथ धेरै लयमा खेल्यौं । साच्चै हामीले आफ्ना काम गर्यौं’, उनले थपे, ‘यो नजिताले पनि देखाउँछ कि हामी सहि बाटोमा छौं । लिओनल मेस्सी र अन्सु फातीले महत्वपूर्ण आक्रमणले हामी बालाइडोसमा सफल नतिजाको हकदार बन्यौं ।’

कप्तान मेस्सी र युवा खेलाडीको तारिफ गरेका कोम्यानले भने, ‘मेस्सीले बिना बल पनि निकै मेहनत गरे । जितमा उनको भूमिका महत्त्वपूर्ण थियो । युवा खेलाडीले पनि आफ्नो जिम्मेवारी पूरा गरे,’ कोम्यानले थपे, ‘बिहीबार नै च्याम्पियन्स लिगको समूह विभाजनमा बार्सिलोना युभेन्ट्ससँग एउटै समूहमा परेको छ । हामीलाई थाहा छ युभेन्ट्स समूहको बलियो टोली मध्ये एक हो, आशा गरौं हामी च्याम्पियन्स लिगको नकआउट चरणमा पुग्नेछौं । हामी अघि बढ्दै जानुपर्छ ।’

बार्सिलोनाले झन्डै ५ वर्षपछि सेल्टा भिगोको मैदानमा जित हासिल गरेको हो । अघिल्लो सिजन बराबरीमा रोकिँदा उपाधि होडबाट बाहिरिएको बार्सिलोनाले त्यसअघि सिजनमा पनि सेल्टालाई उसको मैदानमा हराउन सकेको थिएन ।