एजेन्सी – इंग्लिस क्लब लिभरपुलका फरवार्ड साडियो मानेलाई पनि कोरोना भाइरस (कोभिड–१९) संक्रमण पुष्टि भएको छ ।

लिभरपुलकै थियागो अलकान्तारालाई कोरोना पुष्टि भएको तीन दिनपछि नै मानेलाई पनि कोरोना संक्रमण पुष्टि भएको क्लबले जनाएको छ । लिभरपुललको एक विज्ञप्ति जारी गर्दै उनमा कोरोनाको सामान्य लक्षण देखिएपनि उनको स्वास्थ्य राम्रो रहेको र सेल्फ आइसोलेसनमा बसिसकेको उल्लेख गरेका छन् ।

२८ वर्षीय सेनेगलका माने गत सोमबार राति आर्सनलमाथि ३–१ को जित निकालेको खेलमा सहभागी रहेका थिए । बिहीबार राति इएफल कप अर्थात कारवाओ कपमा आर्सनलसँग पेनाल्टी सुटआउटमा पराजित हुँदा भने उनी टोलीमा थिएनन् ।

‘थियागो जस्तै मानेको लागि पनि क्लबले समायवधि अनुसार सुरक्षित स्वास्थ्य पद्दति अपनाउनेछ । उनी आफ्नो सेल्फ आइसोलेसन बसेर कोरोनामुक्त भएपछि मात्रै टोलीमा समावेश हुनेछन्,’ क्लबले जारी गरेको विज्ञप्तिमा उल्लेख छ ।

मानेले यो सिजन लिभरपुलका लागि तीन गोल गरिसकेका छन् । अन्तर्राष्ट्रिय ब्रेक हुनुअघि मानेले एस्टन भिल्लाविरुद्धको खेल गुमाउनेछन् । त्यसपछि १७ अक्टोबरमा हुने एभर्टनविरुद्धको मर्सिसाइड डर्बीमा उनी उपलब्ध हुन सक्नेछन् ।

प्रिमियर लिगले गत सोमबार १० खेलाडीमा कोरोना पुष्टि भएको घोषणा गरेको थियो । जुन सिजन सुरु भएपछि पछिल्लो समय खेलाडीमा बढी संक्रमण देखिएको हो ।