एजेन्सी – इंग्लिस क्लब टोटेनहम हस्टपरले लामो समयदेखि अनुबन्ध गर्न खोजिरहेको दोस्रो फरवार्डको रुपमा पोर्चुगिज क्लब बेन्फिकाका ब्राजिली फरवार्ड कार्लाेस भिनिसियसलाई अनुबन्धित गरेको छ ।

टोटेनहमले २५ वर्षीय भिनिसयसलाई एक सिजनका लागि २.७ मिलियन पाउन्डमा लोनमा अनुबन्धित गरेको हो । सम्झौतामा टोटेनहमले भिनीसियसलाई अर्को सिजन स्थायी खेलाडी बनाउन ४५ मिलियन युरो तिर्नुपर्ने शर्त रहेको छ । भिनिसियसले गत सिजन ४९ खेलमा २४ गोल गरेका थिए । उनले पोर्चुगिज लिगमा १८ गोल गर्दै सिजनको सर्वाधिक गोल गर्ने सुचीमा अटाएका थिए ।

अब टोटेनहममा भिनिसियससँगै लुकास मोउरा, स्टेभेन बर्गवाइन, ह्यङ मिन सन र ह्यारी केन फरवार्डको रुपमा रहनेछन् । गत जनवरी र फेब्रुअरीमा केन र सन घाइते र स्पेनिस फरवार्ड फर्नान्डो लोरेन्टेले क्लब छाडेपछि टोटेनहम एक समय फरवार्ड विहीन बनेको थियो ।

भिनिसियस २०१८ मा ब्राजिली क्लब ग्रिमियो एस्पोर्टिभो अनापोलिसबाट इटालियन क्लब नेपोलीमा अनुबन्ध भएका थिए । तर, उनी सोही सिजन नै लोनमा पोर्चुगिज क्लब रियले एभे र त्यसपछि फ्रान्सेली क्लब मोनाकोबाट लोनमा खेलेका थिए । उनले नेपोलीमा एक खेलमा पनि अवसर पाएनन् । उनी २०१९ मा बेन्फिका आएका थिए ।

टोटेनहममा अनुबन्धित भएपछि भिनिसियले यस क्लबमा जोडिन यस परिवारलाई भेट्न पाउदा खुसी रहेको र यहाँ आफ्नो उत्कृष्ट प्रदर्शन दिने प्रयास गर्ने बताएका छन् ।