एजेन्सी – नर्वेजियन फरवार्ड एर्लिङ ब्राउट हालान्डको दुई गोल सहयोगमा बोरुसिया डर्टमुन्डले जर्मन बुन्डेसलिगामा फ्रेइवर्गलाई ४–० ले पराजित गरेको छ ।

घरेलु मैदान सिग्नल इडुना पार्कमा शनिबार राति भएको खेलमा डर्टमुन्डको जितमा हालान्डले दुई गोल गर्दा इम्री क्यान र फेलिक्स पासल्याकले समान एक गरे । पहिलो हाफमा एक तथा दोस्रो हाफमा तीन गोल सम्भव भएको थियो ।

घरेलु मैदानमा डर्टमुन्डले खेलको सुरुवातदेखि नै फ्रेइवर्गलाई दवावमा राखेको थियो । २७औं मिनेटमा जुडे बेलिङहमको प्रहार बाहिरिदा डर्टमुन्ड अग्रता लिनबाट चुक्यो । ३१औं मिनेटमा हालान्डले गोल गर्दै डर्टमुन्डलाई १–० को अग्रता दिलाए ।

उनले जियोभानी रेनाको पासमा पेनाल्टी बक्सबाट दोस्रो बार च्याप्दै गोल गर्न सफल भएका थिए । ३५औं मिनेटमा हालान्ड चुके । ४७औं मिनेटमा इम्री क्यानले जियोभानी रेनाकै कर्नरमा हेडरमार्फत गोल गर्दै डर्टमुन्डलाई २–० को अग्रता दिलाए ।

५१औं मिनेटमा एक्सेल विस्टेलको प्रहार पोस्टबाट थोरै बाहिरियो । ५६औं मिनेटमा भिन्सेन्जो ग्रिफोको प्रहारलाई डर्टमुन्डका डिफेन्डरले ब्लक गर्दै फ्रेइवर्गको गोलअन्तर टारे । ६०औं मिनेटमा निकोलस होफ्लेरको प्रहार बाहिरिदा फ्रेइवर्ग गोलअन्तर घटाउनबाट चुक्यो ।

६६औं मिनेटमा हालान्डले व्यक्तिगत दोस्रो तथा टोलीका लागि तेस्रो गोल गरेपछि डर्टमुन्डले खेलमा ३–० को अग्रता लिन सफल भयो । फ्रेइवर्गका खेलाडीको ब्याकपासलाई जियोभानीले नियन्त्रणमा लिदै दिएको पासमा हालान्डले वान भर्सेस वानकै अवस्थामा गोल गर्न सफल भएका थिए ।

इन्ज्युरी समयको थप गरिएको तेस्रो मिनेटमा हालान्डको पासमा फेलिक्सले गोल गर्दै डर्टमुन्डलाई ४–० को फराकिलो जित दिलाए । यस जितसँगै डर्टमुन्डले ३ खेलबाट ६ अंक जोडेको छ । पराजित फ्रेइवर्गको ४ अंक रहेको छ ।

यस्तै अर्काे खेलमा लिगको शीर्षस्थानमा रहेको टीएसजी होफेनहाइन फ्रान्कफुर्टसँग २–१ ले पराजित भएको छ । होफेनहाइनले १–० ले लिएको अग्रता जोगाउन नसक्दा पराजित हुन पुगेको हो ।

फ्रान्कफुर्टको जितमा डाइची कामदा र बास डोस्टले गोल गरे । होफेनआइनका एन्ड्रेज क्रामारिकले गरेको गोल सान्त्वना बन्यो । जितपछि फ्रान्कफुटले ३ खेलबाट ७ अंक जोडेको छ । समान खेलबाटै पराजित भएको होफेनहाइनको ६ अंक रहेको छ ।