एजेन्सी – इंग्लिस प्रिमियर लिगमा आज आइतबार राति विभिन्न ६ खेलमा प्रतिस्पर्धा हुदैछ । घरेलु मैदानमा आर्सनलले सेफिल्ड युनाइटेडको आतिथ्यता गर्दैछ ।

आर्सनल र सेफिल्डबीचको खेल इमिरेट्स स्टेडियममा नेपाली समयअनुसार राति ६ः४५ बजे हुनेछ । घरेलु मैदानमा आर्सनल सेफिल्डलाई पराजित गर्दै आर्सनल लिगमा तेस्रो जितको खोजीमा हुनेछ ।

आर्सनलले पहिलो खेलमा फुलहमलाई ३–० ले तथा वेस्टह्यामलाई २–१ ले पराजित गर्दा लिभरपुलसँग ३–१ ले पराजित भएको थियो । आर्सनलसँग कप्तान पिएरे इमरिक औवामियाङ, एलेक्सान्द्रे लाकाजेट, विलियन, ग्रानिट झाका, ड्यानियल सेवालोस, डेभिड लुइज, रोव होल्डिङ र बन्ड लेनोलगायतको खेलाडीको साथ रहनेछ ।

यता, लगातार तीन खेलमा पराजित भएको सेफिल्ड आर्सनललाई स्तब्ध पार्दै प्रिमियर लिगमा पहिलो जितको खोजीमा हुनेछ । सेफिल्ड वल्भ्ससँग २–० ले तथा वेस्टह्याम र लिड्ससँग समान १–० ले पराजित भएको थियो ।

सेफिल्डसँग ओलिभर बुर्की, डेभिड म्याकगोल्डरिक, बेन अस्वर्न, जोन इगन र आरोन राम्सडले जस्त खेलाडीको साथ रहेको छ । यि दुई टोली हालसम्म तीन पटक आमने सामने हुदा समान १ जित, बराबरी र हारको नतिजा निस्किएको छ ।

गत जुनमा भएको एफए कपमा आर्सनल २–१ ले विजयी हुदा त्यसअघि प्रिमियर लिगमा १–१ गोलको बराबरी तथा त्यसअघि सेफिल्डले १–० को जित निकालेको थियो ।