एजेन्सी – इंग्लिस प्रिमियर लिगमा आज आइतबार राति विभिन्न ६ खेलमा प्रतिस्पर्धा हुदैछ । घरेलु मैदानमा म्यानचेस्टर युनाइटेडले टोटेनहम हस्टपरको आतिथ्यता गर्दा गतवर्षको विजेता लिभरपुल भिल्ला भ्रमणमा निस्कनेछ ।

म्यानचेस्टर युनाइटेड र टोटेनहमबीचको खेल ओल्ड ट्राफर्डमा राति ९ः१५ बजे शुरु हुनेछ । दुवै टोली प्रिमियर लिगमा दोस्रो जितको खोजीमा हुनेछ । युनाइटेडले २ खेल खेल्दा १ जित र १ हारको नतिजा निकालेको छ । टोटेनहमले ३ खेल खेल्दा समान १ जित, बराबरी र हारको नतिजा निकालेको छ ।

घरेलु मैदानमा हुने खेलमा युनाइटेड टोटेनहमलाई पराजित गर्ने लक्ष्यमा हुनेछ । युनाइटेडका लागि एन्थोनी मार्सियल, मार्कुस रासफोर्ड, ब्रुनो फर्नान्डेस, मासन ग्रीनवुड, पल पोग्वा, नेमान्जा माटिक, ह्यारी मिगुएर, भिक्टर लिन्डेलोफ, आरोन वान बिशाखा र डेभिड डे हेया रहनेछ ।

यता, टोटेनहम पनि घरेलु टोलीलाई पराजित गर्दै प्रिमियर लिगमा दोस्रो जित निकाल्ने दाँउमा हुनेछ । टोटेनहमसँग ह्यारी केन, लुकास मोउरा, सर्जियो रिगुइलोन, ह्यारी विङ्स, म्याट दोहर्थी, बिन डेभिस, इरिक डाएर र ह्युगो लोरिस रहनेछ । उच्च लयमा रहेका ह्युङ मिन सनले ह्यामस्ट्रिङका कारण युनाइटेडविरुद्ध खेल्ने सम्भावना न्युन छ । ग्यारेथ चोटका कारण बेन्चमै सीमित हुनेछन् ।

यि दुई टोलीको पछिल्लो २२ खेलको नतिजा हेर्दा युनाइटेड नै हावी देखिएको छ । युनाइटेडले ११ खेलमा सफलता हात पार्दा टोटेनहम ६ खेलमा विजयी भएको छ । ५ खेल बराबरीमा सकिएको छ । पछिल्लोपट यि दुई टोलीले १–१ गोलको बराबरी खेलेका थिए ।

त्यसअघिको तीन खेलमा युनाइटेड विजयी भएको थियो । टोटेनहमले २०१८ अगस्टमा भएको लिगमा युनाइटेडलाई ३–० ले पराजित गरेको थियो । त्यसयता, टोटेटहमले युनाइटेडलाई हराउन सकेको छैन ।