एजेन्सी – स्पेनिस ला लिगामा आज राति क्याटलान क्लब बार्सिलोनाले सेभियाको सामना गर्दैछ । खेल बार्सिलोनाको मैदान नोउक्याम्पमा नेपाली समयअनुसार राति १२ः४५ बजे हुनेछ ।

घरेलु मैदानमा बार्सिलोना सेभियालाई पराजित गर्दै ला लिगामा लगातार जित निकाल्ने दाउमा हुनेछ । नयाँ सिजनमा उत्कृष्ट सुरुवात गरेको बार्सिलोना सोही उत्कृष्ट प्रदर्शन सेभियाविरुद्धको खेलमा दोहोर्याउने योजनामा हुनेछ ।

नयाँ सिजनको पहिलो खेलमा भिल्लारियललाई ४–० ले पराजित गरेको बार्सिलोनाले दोस्रो खेलमा सेल्टा डि भिगोमाथि ३–० को सहज जित पाएको थियो । यि दुवै खेलमा स्पेनिस युवा प्रतिभा अन्सु फातीले गोल गरेका थिए ।

त्यसैले सेभियाविरुद्धको खेलमा पनि फाती नै टोलीको मुख्य हतियार हुनेछन् । उनलाई कप्तान लियोनेल मेस्सी, फिलिपे कौटिन्हो, एन्टोइन ग्रिजमन, फ्रान्की डि जोङ, सर्जियो बुस्क्जेट्स, जोर्डी अल्वा, सर्जी रोबर्टाे, जेराड पिके, रोनाल्ड एराउजो र गोलरक्षक नेटोले साथ दिनेछन् । नेटोले ला लिगाको दुवै खेलमा गोल खाएका छैनन् ।

यता, सेभिया पनि बार्सिलोनाको मैदानमा अंक नगुमाउने लक्ष्यमा मैदान उत्रनेछ । बलियो बार्सिलोनासँग सकेसम्म जित र कम्तीमा पनि १ अंक लिने दाउमा सेभिया हुनेछ । सेभियाले पनि सुरुवाती दुई खेलमा जित निकालेको छ । पहिलो खेलमा काडिजलाई ३–१ ले हराएको सेभियाले दोस्रो खेलमा लेभान्टेलाई १–० ले पराजित गरेको थियो ।

सेभियासँग जेसस नाभास, डिएगो कार्लाेस, मार्काेस एकुना, सर्जी गोमेज, ओलिभर टोरेस, इभान राकिटिच, सुसो, लुकास ओकम्पास, मुनिर इल हाड्डाडी, युसेफ इन न्यास्री लुक डि जोङ, ओस्कार रोड्रिग्वेज र जोन जोर्डन जस्ता खेलाडी रहेका छन् ।

यि दुई टोली हालसम्म ३० पटक प्रतिस्पर्धा गर्दा बार्सिलोना २२ खेलमा विजयी भएको छ । ३ खेल सेभियाले आफ्नो पक्षमा पार्दा ५ खेल बराबरीमा सकिएको छ । पछिल्लोपटक यि दुई टोलीले गत जुनमा गोलरहित बराबरी खेलेका थिए ।

त्यसअघि बार्सिलोनाले ४–० को सानदार जित निकालेको थियो । सेभियाले २०१९ जनवरीमा भएको कोपा डेल रेमा २–० ले पराजित गरेयता बार्सिलोनालाई चार खेलमा पराजित गर्न सकेको छैन ।