एजेन्सी – लेभान्टेमाथि २–० को सहज जित निकाल्दै डिफेन्डिङ च्याम्पियन रियल म्याड्रिड स्पेनिस ला लिगाको शीर्षस्थानमा उक्लिएको छ ।

रियलले रिल बेटिसलाई १ अंकले पछि पार्दै शीर्षस्थानमा उक्लिएको हो । अपराजित रहेको रियलको ४ खेलबाट १० अंक पुगेको छ । एक खेल बढी खेलेको रियल बेटिसको ९ अंक छ । पराजित लेभान्टे ३ अंकसहित १८औं स्थानमा छ ।

लेभान्टेको मैदानमा आइतबार राति भएको खेलमा रियललाई जिताउन ब्राजिली युवा स्टार भिनिसियस जुनिय र फ्रेन्च फरवार्ड करिम बेन्जेमाले गोल गरे । पहिलो र दोस्रो हाफमा समान १–१ गोल सम्भव भएको थियो ।

खेलको १६औं मिनेटमा भिनिसियस जुनियरको गोलबाट रियलले खेलमा अग्रता लिएको थियो । लुका मोड्रिचको कर्नरमा क्यासमिरोको ब्याक फ्लिक हेडरलाई भिनिसियसले पेनाल्टी बक्समा समय लिदै गोल गर्न सफल भएका थिए । उनले जारी सिजनमा दोस्रो गोल गर्न सफल भएका हुन् । यसअघि भिनिसियसले रियल भालाडोलिडविरुद्धको खेलमा गोल गरेका थिए ।

२१औं मिनेटमा लुका मोड्रिचकै कर्नरमा भिनिसियसले अवसर पाएपनि सदुपयोग गर्न सकेन । ३१औं मिनेटमा घरेलु टोली लेभान्टे बराबरीबाट चुक्यो । कर्नरबाट आएको बललाई निकोला भुक्जेभिकको हेडर क्रसबारमा लाग्दै फर्कदा क्यासमिरोले क्लियर गरिदिए । ३६औं मिनेटमा क्यासमिरोको क्रसमा करिम बेन्जेमाको हेडरले पोस्टको दिशा लिन सकेन ।

५०औं मिनेटमा करिम बेन्जेमाले पेनाल्टी बक्स बाहिरबाट गरेको सशक्त प्रहार पोेलमा लाग्दै बाहिरियो । ५२औं मिनेटमा नाचो फर्नान्डेजको पासमा भिनिसियसको प्रयास दोस्रो बारबाट थोरै बाहिरिदा रियल अग्रता दोब्बर बनाउनबाट चुक्यो । ५४औ मिनेटमा करिम बेन्जेमाको उत्कृष्ट पासमा भिनिसियसले पोस्ट नजिकैबाट गरेको प्रहार बाहिरिदा रियलको अग्रत बढेन ।

५९औं मिनेटमा जोस क्याम्पनाको कर्नरबाट डिफ्लेक्ट हुदै आएको बललाई इनिस बार्डीले गरेको प्रहारलाई रियलका गोलरक्षक कोर्टुवाले पञ्च गर्दै बचाए । ६२औं मिनेटमा डि फ्रुटोसको प्रहारमा कोर्टुवा बिट भएपनि लडेको अवस्थामा दायाँ खुट्टाले उत्कृष्ट बचाउ गरे ।

७०औं मिनेटमा कप्तान सर्जियो रामोसले लुका मोड्रिचको फ्रिकिकमा हेडरमार्फत गोल गरेपनि उनको गोलले भिएआरबाट मान्यता पाएन । ७७औं मिनेटमा थिवाउट कोर्टुवाले उत्कृष्ट बचाउ गर्दै रियलको अग्रता कायम राखे । कार्लाेस क्लेर्क प्रहारलाई कोर्टुवाले अघि बढेर बचाएका थिए । त्यसमै प्राप्त गोन्जाले मेलेरोको हेडर बाहिरिदा लेभान्टे बराबरीबाट चुक्यो ।

इन्ज्युरी समयको थप गरिएको पाँचौ मिनेटमा करिम बेन्जेमाले सिजनको पहिलो गोल गर्दै रियललाई २–० को जित दिलाए । काउन्टर अट्याकमा रोड्रिगोले दिएको पासलाई बेन्जेमाले मैदानको मध्य भागबाट बल अघि बढाउदै उत्कृष्ट फिनिस गरेका थिए ।

अन्य नतिजा
ओसासुनाविरुद्ध सेल्टा डि भिगो (२–०), डिपोर्टिभो एलाभेसविरुद्ध एथ्लेटिको बिल्वाओ (१–०)