एजेन्सी – इटालियन सिरी ‘ए’ मा एसी मिलानले स्पेजियामाथि ३–० को सहज जित हात पारेको छ । घरेलु मैदानमा राफयल लियोले दुई तथा थियो हर्नान्डेजले एक गोल गरेपछि मिलानले सहज जित निकालेको हो ।

सबै तीन गोल दोस्रो हाफमा सम्भव भएको थियो । आइतबार राति भएको खेलमा पाहुना टोलीलाई खेलको सुरुवातदेखि नै दवावमा राखेपनि गोलको लागि दोस्रो हाफ नै कुर्नुपरेको थियो । आठौं मिनेटमा राफयल लियोको प्रहारलाई गोलरक्षक राफयलले बचाएपछि मिलान अग्रता लिनबाट चुकेको थियो । १०औं मिनेटमा ब्राहिम डियाजको प्रहारमा पनि गोलरक्षक राफयल नै बाधक बने । १८औं मिनेटमा सिमोन केजाएरको प्रहार पोस्टबाट थोरै बाहिरियो ।

१९औं मिनेटमा डियाजको प्रहारलाई डिफेन्डर रिकार्डाे मारचिन्जाले ब्लक गर्दै मिलानको अग्रता टारे । २१औं मिनेटमा डाभिड क्यालाब्रियाको विपक्षी खेलाडीको प्रहारलाई क्लियर गर्न खोज्दा आफ्नै पोसटतर्फ पुग्दा गोलरक्षक जियानलुजी डोन्नरुम्माले नियन्त्रणमा लिन सफल भए । ४४औं मिनेटमा लोरेन्जो कोलोम्वोको प्रहारलाई एलेक्सिस सेइलमेकर्सले बचाए । लगत्तै रोबर्टाे पिकोलीको प्रहारलाई गोलरक्षक डोन्नररुम्माले बचाउदै स्पेजियाको अग्रता टारे ।

५७औं मिनेटमा राफयल लियोले गोल गर्दै मिलानलाई १–० को अग्रता दिलाए । उनले हकान कलहानोग्लुको पासमा गोल गर्न सफल भएका थिए । ७६औं मिनेटमा थियो हर्नान्डेजले गोल गर्दै मिलानको अग्रता दोब्बर पारे । त्यसको दुई मिनेटपछि नै राफल लियोले व्यक्तिगत दोस्रो तथा टोलीका लागि तेस्रो गोल गर्दै मिलानलाई ३–० को सहज जित दिलाए ।

जितसँगै अपराजित रहेको मिलान ३ खेलबाट ९ अंक जोडेर दोस्रो स्थानमा उक्लिएको छ । समन खेलबाट ९ अंक न रहेको एटलान्टा गोलअन्तरमा शीर्षस्थानमा छ । पराजित स्पेजियन ३ अंकसहित १५औं स्थानमा छ ।

अन्य नतिजा

एटलान्टाविरुद्ध काग्लिएरी (५–२)

बेनेभेन्टोविरुद्ध बोलोग्ना (१–०)

लाजियोविरुद्ध इन्टर मिलान (१–१)

पार्मा क्लासियोविरुद्ध हेलास भेरोना (१–०)