काठमाडौं (हाम्रो खेलकुद) – शहिद स्मारक बि डिभिजन लिग अन्तर्गत आज भएको तिनै खेल बराबरीमा टुङ्गिएका छन्।

हल्चोक स्थित एपिएफ रंगशालामा भएको खेलमा श्री कुमारी क्लब र आरसीटीले गोलरहित बराबरी खेले। दिनको पहिलो खेलमा भने पुल्चोक स्पोर्टस क्लब र ब्वाइज युनियन क्लबले १-१को बराबरी खेले। सुशील राईको गोलमा ७औं मिनेटमा अग्रता लिएको ब्वाइज युनियनले अग्रता जोगाउन सकेन। पुल्चोकका लागि नवौं मिनेटमा रुमेश बर्तौलाले बराबरी गोल गरेका थिए।

एन्फा कम्पलेक्सको एष्ट्रो टर्फमा भएको खेलमा मध्यपुर युथ एसोसिएसन र बाँसबारी क्लबले ३-३को बराबरी खेले। खेलको १६ मिनेटमै ३-०ले अघि बढेको मध्यपुरले जित दर्ता गर्न सकेन। मध्यपुरका लागि सबिन डंगेोलले पहिलो, निशान बस्नेतले चौथो र अनिस श्रेष्ठले सोह्रौ मिनेटमा गोल गरेका थिए।
खेललाई बराबरी गर्न बाँसबारीका अरिक विष्टले मुख्य भुमिका खेलेका थिए। विष्टले २५औं मिनेटमा उत्कृष्ट फ्रिकिक प्रहार गर्दै बाँसबारीको आशा जगाएका थिए। ओम बिक्रम घलेले ५९औं मिनेटमी अग्रतालाई घटाएका थिए भने अरिक विष्टले पुन: ८७औं मिनेटमा गोल गर्दै खेललाई बराबरीमा पुर्याएका थिए।