एजेन्सी – पोर्चुगिज युवा फरवार्ड जोआओ फेलिक्सले उत्कृष्ट प्रदर्शनका साथ २ गोल गरेपछि एटलेटिको म्याड्रिडले यूईएफए च्याम्पियन्स लिगमा रेड बुल साल्जबर्गमाथि ३-२ को जित हासिल गरेको छ ।

एटलेटिकोले खेलको २९ औं मिनेटमा नै मार्कोस लोरेन्टेको गोलमा अग्रता लिएको थियो । उनले मिडफिल्डबाट बल अघि बढाउँदै गरेको प्रहार गोलरक्षक सिसान स्तान्कोभिचले बचाउन सकेनन् । अग्रता लिएको केहिबेर पछि नै लोरेन्टे वन भर्सेस वनको अवस्थामा भने सफल भएनन् ।

४० औं मिनेटमा युवा मिडफिल्डर डोमिनिक सोबोस्ज्लाईले खेल बराबरीमा ल्याए । मिडफिल्डमा बल खोसेपछि प्राप्त बललाई डोमोनिकले गोलमा परिणत गरेका थिए । दोस्रो हाफको सुरुवातमै पाहुना टोली साल्ज्बर्गले अग्रता लियो । मेर्गिम बेरिशाको प्रहार फिलिपेलाई लाग्दै गोल भएपछि एटलेटिको २-१ ले पछि परेको थियो ।

५२ औं मिनेटमा फेलिक्सले बराबरी गोल गर्दै घरेलु टोलीलाई खेलमा फर्काए । एन्जल कोर्रियाको क्रसलाई उनले सहजै ट्याप इन गोल गरेका थिए । खेलको ५ मिनेट समय बाँकी रहँदा फेलिक्सले व्यक्तिगत दोस्रो गोल गरे । उनले थोमस लेमारको क्रसलाई गोलमा परिणत गर्दै जारी सिजन पहिलो जित दिलाए ।

प्रशिक्षक डिएगो सिमिओनीले फेलिक्सले एटलेटिको आएदेखिको उत्कृष्ट प्रदर्शन आज गरेको बताए । ‘आजको खेलको महत्त्वले गर्दापनि आज फेलिक्सको प्रदर्शन एटलेटिको जर्सीमा हालसम्मकै उत्कृष्ट थियो । उनले अरु खेल पनि यसै स्तरमा खेलेका छन् । तर आज उनी पूरा समय एकै लयमा खेल्न सफल रहे,’ सिमिओनीले थपे ।

एटलेटिको पहिलो खेलमा बायर्नसँग ४-० ले पराजित भएको थियो । बायर्नले आफ्नो खेलमा लोकोमोटिभ मस्कोलाई २-१ ले पराजित गर्दै शत प्रतिशत जितको सिलसिला कायम राख्यो । बायर्न २ खेलमा ६ अंकसहित शीर्षस्थानमा छ । एटलेटिको ३ अंकसहित दोस्रो स्थानमा रहँदा मस्को र साल्जबर्गको १-१ अंक रहेको छ ।

यो पनि : बायर्नको लगातार १३ औं जित

लिभरपुलको जितमा थपियो चोटको चिन्ता