एजेन्सी – फ्रान्सेली फरवार्ड एलेसन प्लेयाको ह्याट्रिकमा यूईएफए च्याम्पियन्स लिग अन्तर्गत मंगलबार भएको समूह बी को खेलमा बोरुसिया मोन्चेनग्लाडबाकले साख्तर डोनेस्कलाई ६-० को फराकिलो अन्तरले पराजित गरेको छ ।

फरवार्ड प्लेयाले ह्याट्रिकसहित १ असिस्ट दिँदै उत्कृष्ट प्रदर्शन गरेपछि पाहुना टोलीले सहज जित हासिल गरेको हो । यस जितसँगै बोरुसिया अंक तालिकाको शीर्षस्थानमा उक्लन सफल रहयो । आक्रामक फुटबल खेल्दै आएको जर्मन टोलीले पहिलो हाफमा नै ४-० को अग्रता लिएको थियो ।

फरवार्ड प्लेयाले खेलको आठौँ मिनेटमा नै गोलको खाता खोलेका थिए । उनले स्टेफान लाइनरको क्रसलाई पेनाल्टी क्षेत्र भित्रबाट गोलमा परिणत गरेका थिए । १७ औं मिनेटमा साख्तारका भालेरी बोनदारले आत्मघाती गोल गरेपछि ग्लाडबाक २-० ले अघि बढ्यो ।

२६ औं मिनेटमा प्लेयाले लार्स स्तिन्दलको पासलाई सदुपयोग गर्दै व्यक्तिगत दोस्रो गोल गरे । पहिलो हाफको अन्तिम मिनेटमा पाहुना टोलीले अग्रता थप फराकिलो पार्यो । कर्नरमा आएको बल क्लियर हुन नसक्दा रामी बेन्सेबैनीले गोल गर्दै ४-० को अग्रता दिलाए ।

दोस्रो हाफमा साख्तरले तीन खेलाडी परिवर्तन गरेपनि खेलमा फर्कने कुनै संकेत दिन सकेन । ६५ औं मिनेटमा प्लेयाको पासमा स्तिन्दलले गोल गर्दै खेललाई ५-० को स्थितिमा पुर्याए । ७६ औं मिनेटमा प्लेयाले ह्याट्रिक पूरा गरे । उनले मार्कस ठुरामको पासमा गरेको गोलमा रेफ्रीले भीएआरको सहायता लिएपनि गोल मान्य भएको थियो ।

यस जितसँगै जर्मन टोली समूहको अंक तालिकाको शीर्षस्थानमा उक्लिएको छ । अपराजित रहेको ग्लाडबाकको ३ खेलमा ५ अंक छ । समान ४-४ अंक जोडेपनि हेड टु हेडमा साख्तरले रियललाई उछिनेको छ । पुछारमा रहेको इन्टरको मात्र २ अंक छ ।