एजेन्सी – इटालियन च्याम्पियन युभेन्टसले इटालियन सिरी ए अन्तर्गत शनिबार घरेलु मैदानमा कग्लियारीको सामना गर्दैछ । खेल नेपाली समयानुसार मध्यरात १:३० बजेपछि सुरु हुनेछ ।

घरेलु मैदानमा पछिल्ला ३८ खेलमध्य ३७ खेलमा अपराजित रहेको युभेन्टस लिगमा जितको लय समात्ने सुरुमा हुनेछ । टोलीले खेलेका पछिल्ला ५ खेलमा २ जितमात्र दर्ता गरेको छ । क्रिस्टियानो रोनाल्डो कोरोना संक्रमणका कारण बाहिरीपछि टोलीको लय खस्केको थियो । पछिल्लो खेलमा रोनाल्डोले पुनरागमन गरेपनि युभेन्टस लाजियोसँग १-१ को बराबरीमा रोकियो ।

यता पछिल्लो ५ मध्य ४ खेलमा जित हासिल गरेको काग्लियारी आफ्नो लयलाई कायम राख्न चाहन्छ । अंक तालिकामा ३ अंक मात्र फरक रहेका यी दुई टोलीबीच यस मैदानमा भएको पछिल्लो ४ भिडन्तमा युभेन्टसले नै जित हासिल गरेको छ । युभेन्टस १३ अंकसहित पाँचौ स्थानमा रहँदा काग्लियारी १० अंक जोड्दै ११ औं स्थानमा छ ।

युभेन्टसका लागि यस खेलमा डिफेन्डरद्वय लिओनार्डो बोनुची र जिओर्जियो किएलिनी चोटका कारण उपस्थित छैनन् । मिडफिल्डर आरोन राम्सी पनि चोटसँग जुधिरहेका छन् । म्याथिस डे लिग्ट र एलेक्स सान्द्रो टोलीमा फर्कनुले भने निकै सहयोग पुग्नेछ । प्रशिक्षक आन्द्रीए पिर्लोले जियानलुइजी बुफोनलाई गोलरक्षकको जिम्मेवारी दिने सम्भावना छ ।

काग्लियारीका लागि लुका चेपिटेली, चरलाम्पोस लाइकोजियानिस र पाओलो फारोगो चोटका कारण बाहिर छन् । आन्द्रीए कार्बोनीले लेफ्ट ब्याकमा सुरुवात गर्नेछन् । कप्तान जोआओ पेड्रो आफ्नो उच्च लयलाई साविक विजेताविरुद्ध पनि निरन्तरता दिन चाहन्छन् ।