एजेन्सी – स्पेनिस ला लिगामा आज (शनिबार) राति विभिन्न चार खेलमा प्रतिस्पर्धा हुँदैछ । साविकको विजेता रियल म्याड्रिडले घरेलु मैदानमा डिर्पाेटिभो अलाभेसको सामना गर्दा एट्लेटिको म्याड्रिडले भ्यालेन्सियासँग खेदैछ ।

इल्चे र क्याडिज तथा हुएस्का र सेभियाबीच आज राति नै प्रतिस्पर्धा हुदैछ । रियल र एलाभेसबीचको खेल अल्फ्रेडो डि स्टेफानोमा नेपाली समयअनुसार रासत १ः४५ बजे हुनेछ । घरेलु मैदानमा एलाभेसलाई पराजित गर्दै रियल अंक तालिका सुधार गर्ने दाउमा हुनेछ । चौथो स्थानमा रहेको रियलको ९ खेलबाट १७ अंक रहेको छ ।

चोटका कारण टोलीका मुख्य फरवार्ड करिम बेन्जेमा, फेडरिको भालभेर्डे, कप्तान तथा डिफेन्डर सर्जियो रामोस र ड्यानियल कार्भाहल टोली हुनेछैनन् । तर, रियलसँग इडेन हाजार्ड, भिनिसियस जुनियर, रोड्रिगो गोएस, मार्काे एसेन्सियो, टोनी क्रुस, क्यासमिरो, मार्टिन ओडेगार्ड, मार्सेलो, फर्लान्ड मेन्डी, राफयल भरान, नाचो फर्नान्डेस, लुकास भास्क्वेज र गोलरक्षक थिवाउट कोर्टुवा टोलीमा रहेका छन् ।

यता, अलाभेस पनि रियललाई उसकै मैदानमा हराउने लक्ष्यमा मैदान उत्रनेछ । अलाभेससँग जोसेलु, लुकास पेरेज, जोटा, टोमास पिना, एडगर मेन्डेज र गोलरक्षक फर्नान्डो पाचेकोको साथ रहेको छ । अलाभेस १० खेलबाट १० अंक जोडेर १५औं स्थानमा रहेको छ ।

अन्य खेल
इल्चेविरुद्ध क्याडिज (साँझ ६ः४५ बजे), भ्यालेन्सियाविरुद्ध एट्लेटिको म्याड्रिड (राति ९ बजे) र हुएस्काविरुद्ध सेभिया (राति ११ः१५ बजे)