एजेन्सी – कप्तान लियोनेल मेस्सीको एकमात्र निर्णायक गोलमा क्याटलान क्लब बार्सिलोनाले स्पेनिस ला लिगामा लेभान्टेमाथि १–० को झिनो जित निकालेको छ ।

क्याम्पनोउमा बल पोसेसनमा पकड बनाएपनि बार्सिलोनाले गोलको निकै संघर्ष गर्नुपरेको थियो । बार्सिलोनाका अधिकांश प्रहारमा लेभान्टेका गोलरक्षक एइटर बाधक बनेका थिए ।

खेलको १२औं मिनेटमा पाहुना टोली लेभान्टेले सुवर्ण अवसर पाएपनि डि फ्रुटोसको प्रहार गोलरक्षक मार्क आन्दर टेर स्टेगनको हातमा पुगेको थियो । १६औं मिनेटमा मार्टिन ब्रेथवेटको प्रहार पोस्ट नजिकैबाट बाहिरियो । २१औं मिनेटमा प्तान लियोनेल मेस्सीको फ्रिकिकमा ग्रिजमनको हेडरलाई डिफेन्डरले क्लियर गरेपनि क्लेमेन्ट लेङ्लेटले भेट्न सकेन ।

२७औं मिनेटमा जोर्डी अल्वाको क्रसमा मेस्सीको फ्रिहेडरले पोस्टको गित लिन सकेन । ३९औं मिेनटमा मेस्सी र ग्रिजमनको समन्वयमा बनेको मुभमा गोलरक्षक बाधक बने । ७२औं मिनेटमा ब्रेथवेटले फ्रि हेडरको अवसर पाएपनि उनको हेडर आकासियो । ७६औं मिनेटमा फ्रान्की डि जोङको पासमा मेस्सीले गोल गर्दै बार्सिलोनालाई १–० को अग्रता दिलाए ।

जितसँगै बार्सिलोना ११ खेलबाट १७ अंक जोडेर आठौं स्थानमा उक्लिएको छ । पराजित लेभान्टे ११ अंक जोडेर १८औं स्थानमा रहेको छ ।